சட்ட மேதை டாக்டர் அம்பேத்கரின் 125ஆவது பிறந்ததினம் கொண்டாடப்பட்டு வரும் நிலையில், அவரது படைப்புகளையும், உரைகளையும் மறு பதிப்பு செய்வதற்கு மத்திய அரசு திட்டமிட்டுள்ளது.

 இதற்கு அனுமதிகோரி, அம்பேத்கரின் பேரன் பிரகாஷ் அம்பேத்கர், மகாராஷ்டிர முதல்வர் தேவேந்திர பட்னவீஸ் ஆகியோருக்கு மத்தியஅரசு கடிதம் எழுதியுள்ளது.

 இது தொடர்பாக அவர்களுக்கு மத்திய சமூக நீதித்துறை அமைச்சர் தாவர்சந்த் கெலாட் எழுதிய கடிதத்தில் தெரிவிக்கப்பட்டிருப்பதாவது:

 பிரதமர் நரேந்திரமோடி வெளியிட்ட அறிவிப்பின்படி, டாக்டர் அம்பேத்கரின் 125ஆவது பிறந்ததினம் கடந்த ஆண்டு ஏப்ரல் மாதம் 14ம் தேதி முதல், வரும் ஏப்ரல் மாதம் 14ஆம் தேதி வரை கொண்டாடப்படுகிறது. இதையொட்டி நாடு முழுவதும் பல்வேறு நிகழ்ச்சிகள் நடத்தப்படுகின்றன. தபால் தலைகள் வெளியிடப்படுகின்றன.

 இந்நிலையில், டாக்டர் அம்பேத்கர் பதிப்பக குழுவுடன் கடந்த 2013ம் ஆண்டு அக்டோபர் மாதம் 8ஆம் தேதி நடைபெற்ற சந்திப்பின்போது, ஆங்கிலத்தில் இருக்கும் அம்பேத்கரின் படைப்புகளும், உரைகளும் மறுபதிப்பு செய்வதுதொடர்பாக கேள்விகள் எழுப்பப்பட்டன.

 இதனிடையே, மகாராஷ்டிர கல்வித் துறையால் கடந்த 2013ஆம் ஆண்டில் ஆங்கிலத்தில் வெளியிடப்பட்ட அம்பேத்கரின் படைப்புகளையும், உரைகளையும் மறு பதிப்பு செய்வதற்கு கட்டுப்பாடுகள் விதித்து மாநில உயர்கல்வி, தொழில் கல்வித் துறை முதன்மைச் செயலர் கடந்த 2014ஆம் ஆண்டு ஜூலை மாதம் உத்தரவு பிறப்பித்தார். இதுதொடர்பாக மத்திய அமைச்சர் பிரகாஷ் ஜாவடேகரும், நானும் ஆலோசனை நடத்தினோம். அப்போது, அம்பேத்கரின் படைப்பு களையும், உரைகளையும் மறுபதிப்பு செய்வதற்கு அனுமதிகோருவது என்று முடிவு செய்யப்பட்டது.

 ஆதலால், மகாராஷ்டிர கல்வித் துறையால் 2013ம் ஆண்டு வெளியிடப்பட்ட அம்பேத்கரின் படைப்புகள் மற்றும் உரைகளை மறு பதிப்பு செய்வதற்கு மத்திய அரசுக்கு நீங்கள் ஒத்துழைப்பு வழங்க வேண்டும் என்று கேட்டுக் கொள்கிறேன் என்று அந்த கடிதத்தில் தாவர் சந்த் கெலாட் குறிப்பிட்டுள்ளார்.

Leave a Reply