தில்லி ஜவாஹர்லால் நேரு பல்கலைக் கழக விவகாரத்தில் காங்கிரஸ் மற்றும் கம்யூனிஸ்ட்கள் தேசவிரோத சக்திகளுக்கு ஆதரவாக செயல் படுவதாக பாஜக தேசிய செயலாளர் ஹெச்.ராஜா குற்றஞ்சாட்டினார்.

இதுகுறித்து, அவர் கோவையில் செய்தியாளர்களிடம் சனிக்கிழமை கூறியதாவது:

 தில்லி ஜவாஹர்லால் நேரு பல்கலைக் கழகத்தில் மாணவர் சங்க தலைவர் தேசவிரோத செயல்களில் ஈடுபட்டதால் கைது செய்யப்பட்டார். இந்நிலையில், கைது செய்யப்பட்ட மாணவர்களுக்கு ஆதரவாக காங்கிரஸ் கட்சி தலைவர் ராகுல் காந்தி, கம்யூனிஸ்ட் கட்சித் தலைவர்கள் சீதாராம் யெச்சூரி, டி.ராஜா ஆகியோர் பேசி வருகின்றனர். இது போன்ற செயல்கள் மூலமாக காங்கிரஸ், கம்யூனிஸ்ட் கட்சிகள் தேசவிரோத சக்திகளுக்கும், நாட்டைத் துண்டாட நினைக்கும் பிரிவினைவாத சக்திகளுக்கும் ஆதரவாகச் செயல்பட்டு வருகின்றன.

  தமிழகத்தில் காங்கிரஸ், திமுக கூட்டணி தமிழர்களுக்கு எந்த வித நல்ல திட்டங்களையும் செயல் படுத்தவில்லை .

 கெயில் எரிவாயுத்திட்டம் காங்கிரஸ், திமுக கூட்டணியில் கொண்டுவரப்பட்டது. எனினும் தமிழக விவசாயிகளின் நலனை பாதிக்கும் இத்திட்டத்தில் விவசாயிகளுக்கு ஆதரவாக பாஜக செயல்படும்.

சட்ட பேரவைத்தேர்தலில் பிரதமர் நரேந்திர மோடியின் ஏழை, எளிய மக்களுக்கான செயல்திட்டங்களை மக்கள் முன் எடுத்துச்செல்ல உள்ளோம். இந்தத் திட்டங்கள் குறித்து மார்ச் 1-ம் தேதி முதல் தமிழகத்தில் மத்திய அமைச்சர் பொன்.ராதாகிருஷ்ணன், மாநிலத்தலைவர் தமிழிசை சௌந்தரராஜன், சி.பி.ராதாகிருஷ்ணன், வானதி சீனிவாசன் உள்ளிட்டோர் ரதயாத் திரைப் பிரசாரம் மேற்கொள்ளவுள்ளனர்.

 கடந்த 60 ஆண்டுகளில் நதிகளை இணைப்பது தொடர்பான வெறும் அறிவிப்புகள்மட்டுமே வந்து கொண்டிருக்கின்றன. ஆனால், குஜராத்மாநிலத்தில் கடந்த 2002-ஆம் ஆண்டு 16 நதிகளை இணைத்தது பாஜக அரசு.  அதேபோல, தமிழகத்தில் பாஜக ஆட்சிக்குவந்தால் அனைத்து நதிகளையும் ஒன்றிணைத்து விவசாயிகளின் நலைனைப் பாதுகாக்கும் என்றார்.

 

Leave a Reply

Your email address will not be published.