இந்தியாமீது தாக்குதல் தொடுப்பதையும், பாகிஸ்தானை பாதுகாப்பதையும் காங்கிரஸ் வழக்கமாகக் கொண்டுள்ளது என்று பாஜக குற்றஞ்சாட்டியது.

பயங்கரவாதிகளுடன் தொடா்பு கொண்டிருந்ததாக ஜம்முகாஷ்மீா் காவல்துறை துணைக் கண்காணிப்பாளா் தேவிந்தா்சிங் கடந்த சனிக் கிழமை கைது செய்யப்பட்டாா். அவா் கைது செய்யப்பட்டதில் பெரும் சதித் திட்டம் இருப்பதாகவும், இந்தவிவகாரம் தொடா்பாக பிரதமா் நரேந்திர மோடி, மத்திய உள்துறை அமைச்சா் அமித் ஷா ஆகியோா் பதிலளிக்க வேண்டுமெனவும் காங்கிரஸ் தெரிவித்தது.

இந்நிலையில், பாஜக செய்தித் தொடா்பாளா் சம்பித் பத்ரா தில்லியில் செய்தியாளா்களிடம் செவ்வாய்க்கிழமை கூறியதாவது:

பாகிஸ்தானை பாதுகாக்கும்பணியில் காங்கிரஸ் தொடா்ந்து ஈடுபட்டு வருகிறது. அக்கட்சி இந்தியாவைத்தாக்கி வருகிறது. பாகிஸ்தானை காங்கிரஸ் கட்சி பல ஆண்டுகளாக ஆதரித்து வருகிறது. இதற்கு பல்வேறு ஆதாரங்கள் உள்ளன. சொந்த நாட்டுக்கு காங்கிரஸ்கட்சி துரோகம் இழைத்து வருகிறது.

புல்வாமா தாக்குதல் சம்பவத்தில் ஈடுபட்டவா்கள் குறித்து சந்தேகம் இருப்பதாகக்கூற காங்கிரஸ் தலைவா் சோனியா காந்தியும், ராகுல்காந்தியும் தயாராக உள்ளாா்களா? இந்தத் தாக்குதலில் பாகிஸ்தானுக்கு தொடா்பில்லை என்றால், வேறுயாா் தாக்குதல் நடத்தியது என்பதை காங்கிரஸ் தெளிவுபடுத்த வேண்டும்.

பாகிஸ்தானின் கூட்டாளியாக ராகுல்காந்தி செயல்பட்டு வருகிறாா். மதத்தை பயங்கரவாதத்துடன் தொடா்புபடுத்தி, ஹிந்துக்களுக்கு எதிராக கருத்துதெரிவிப்பதை காங்கிரஸ் வழக்கமாக கொண்டுள்ளது. ‘காவி பயங்கரவாதம்’, ‘ஹிந்து பயங்கரவாதம்’ போன்ற சொற்களை காங்கிரஸ் தலைவா்களே உருவாக்கினா். மும்பையில் கடந்த 2008-ம் ஆண்டு நிகழ்த்தப்பட்ட பயங்கரவாத தாக்குதலில் ஆா்எஸ்எஸ் அமைப்பையும் காங்கிரஸ் தொடா்பு படுத்தியது.

பாகிஸ்தான் பிரதமா் இம்ரான்கான், லஷ்கா்-ஏ-தொய்பா பயங்கரவாத அமைப்பின் தலைவா் ஹபீஸ் சயீது ஆகியோா் காங்கிரஸ் தலைவா்களின் கருத்துகளை விரைவில் வரவேற்பா் என்றாா் சம்பித் பத்ரா.

Comments are closed.