பாஜக தேசியத்தலைவர் பதவிக்கு வரும் டிசம்பர் மாதம் தேர்தல் நடைபெறும் என கட்சியின் தேசிய செயல்தலைவர் ஜே.பி.நட்டா அறிவித்துள்ளார்.

பாஜக தேசிய செயல்தலைவர் ஜே.பி.நட்டா தில்லியில் செய்தியாளர்களைச் சந்தித்தபோது பேசியதாவது ,

“கட்சியின் தேசியத்தலைவர் பதவிக்கு தேர்தல் நடைபெறவுள்ளது. தேசியளவிலான இந்தத்தேர்தல் வரும் டிசம்பர் மாதம் நடைபெறும். அதேசமயம், வாக்குச்சாவடி வாரியாக அக்டோபர் 10 முதல் அக்டோபர் 30 வரை தேர்தல் நடைபெறவுள்ளது. மாநிலப்பிரிவுக்கான தேர்தல்கள் நவம்பர் மாதம் நடைபெறுகிறது.

எங்கள் கட்சி உறுப்பினர்களைக் காட்டிலும், கூடுதல் மக்கள்தொகை கொண்ட நாடுகளின் எண்ணிக்கை வெறும் 8 மட்டுமே” என்றார்.

மத்திய உள்துறை அமைச்சர் அமித்ஷா, கடந்த 2014 முதல் பாஜகவின் தேசியத்தலைவராக உள்ளார். கட்சியின் விதிப்படி, ஒருதலைவர்  இரண்டு பொறுப்புகளை வகிக்கக்கூடாது. இதனால், மக்களவைத் தேர்தலுக்குப்பிறகு பாஜகவுக்கு புதிய தலைவர் தேர்வு செய்யப் படுவார் என்று எதிர்பார்க்கப் பட்டது. எனினும், தேசிய செயல்தலைவராக ஜே.பி.நட்டா தேர்வு செய்யப்பட்டார்.

Comments are closed.