இந்திய மக்களவைத் தேர்தலில் பாஜக வெற்றிபெற்றால் அந்நாட்டுடன் அமைதி பேச்சுக்கும், ஜம்முகாஷ்மீர் பிரச்னைக்கு தீர்வு காணவும் வாய்ப்பு ஏற்படும் என்று பாகிஸ்தான் பிரதமர் இம்ரான் கான் கூறியுள்ளார்.

இஸ்லாமாபாதில் புதன்கிழமை வெளிநாடுகளைச் சேர்ந்த செய்தியாளர்கள் குழுவைச்சந்தித்த இம்ரான்கான் கூறியதாவது:
இந்தியாவில் வலதுசாரி (பாஜக) ஆட்சி அமைந்தால் காஷ்மீர் பிரச்னைக்கு தீர்வு காணும் விஷயத்தில் பிரச்னை ஏற்படும் என்று பிறகட்சிகள் நினைக்கலாம். ஆனால், பாஜக வெற்றிபெற்றால், இந்தியாவுடன் அமைதிப் பேச்சு நடத்தவும், ஜம்மு-காஷ்மீர் பிரச்னைக்கு தீர்வுகாணவும் வாய்ப்பு அதிகம் என்றே நான் கருதுகிறேன்.

காஷ்மீர் விவகாரம்தான் இந்தியா-பாகிஸ்தான் இடையே முக்கியப் பிரச்னையாக உள்ளது. ஜெய்ஷ்-ஏ-முகமது உள்பட அனைத்து பயங்கரவாத அமைப்புகள்மீதும் பாகிஸ்தான் நடவடிக்கை எடுத்துள்ளது. பாகிஸ்தானில் பயங்கரவாதத்தை ஒழிக்கும் நடவடிக்கையில் ஜெய்ஷ்-ஏ-முகமது உள்பட பலபயங்கரவாத அமைப்புகள் ஆயுதங்களை எடுப்பதை முழுமையாக தடுத்து நிறுத்தியுள்ளோம். அந்த அமைப்புகள் நடத்திவந்த மதராஸாக்கள் உள்ளிட்ட கல்வி நிலையங்களை பாகிஸ்தான் அரசு தனது கட்டுப்பாட்டில் எடுத்து கொண்டுள்ளது. இதன்மூலம் அவர்களது நடவடிக்கைகள் கட்டுப்படுத்தப் பட்டுள்ளன.

பாகிஸ்தானின் எதிர் காலம் மிகவும் முக்கியமானது. எனவே, நாங்கள் பயங்கரவாத அமைப்புகளை ஒரு போதும் அனுமதிக்க மாட்டோம். சர்வதேச நெருக்கடிகளின் காரணமாகவே பயங்கரவாத அமைப்புகள் மீது பாகிஸ்தான் அரசு நடவடிக்கை எடுத்தது என்று கூறுவது தவறு என்றார் இம்ரான் கான்.

Leave a Reply

Your email address will not be published. Required fields are marked *