பிரதமர் மோடியின் வெளிநாட்டு பயணங்கள் என்பது எதிர்கட்சிகளால் கடுமையாக விமர்சிக்கப்பட்ட ஒருவிஷயமாகும். மக்களின் வரிப்பணத்தில் உல்லாசமாக ஊர்சுற்றுகிறார் பிரதமர் என எதிர்கட்சித் தலைவர்கள் சாடினர்.ஆனால் பிரதமரின் பயணங்களால் நாட்டிற்கு நன்மைதான் கிடைத்தது என பாஜகவின் அக்குற்றச்சாட்டை மறுத்துவருகின்றனர்.

இந்நிலையில் பாஜக பிரமுகர் ஒருவர் பிரதமர் மோடியின் 107 வெளிநாட்டு பயணங்கள் தொடர்பாக புத்தகம் ஒன்றை வெளியிட்டுள்ளார். “Modi India Calling – 2021″என்ற தலைப்பிலான இப்புத்தகத்திற்கான விதையிட்டவர் பாஜக தலைவர் விஜய்ஜாலி. டெல்லிமாநில பாஜக தலைவர் அதேஷ் குப்தா இப்புத்தகத்தை வெளியிட்டார்.

தென் ஆப்பிரிக்காவில் இருந்து மகாத்மாகாந்தி நாடு திரும்பிய ஜனவரி 9ம் தேதியை Pravasi Bharatiya Divas என மத்திய அரசு கொண்டாடிவருகிறது. வெளிநாடுகளில் வாழும் இந்திய சமூகத்திற்கு, இந்திய அரசுக்குமான உறவை வலுப்படுத்தும் நோக்கில் இந்நாளை முதல்முறையாக வாஜ்பாய் தலைமையிலான அரசின்போது 2003ல் அனுசரித்தனர். 2015 வரைஆண்டுதோறும் கொண்டாடப்பட்ட இந்நாள் தற்போது இரண்டாண்டுகளுக்கு ஒருமுறை கொண்டாடப்படுகிறது. Pravasi Bharatiya Divas-ஐ முன்னிட்டு இப்புத்தகம் வெளியிடப்பட்டிருக்கிறது.

புத்தகம் தொடர்பாக பேசிய பாஜக தலைவர் விஜய்ஜாலி, “பிரதமர் மோடியின் வெளிநாட்டு பயணங்கள் எந்தவகையில் நாட்டுக்கு நன்மையை சேர்த்தன, மோடி எவ்வாறு வெளிநாட்டு தலைவர்களால் மதிக்கப்பட்டார், அப்போது எடுக்கப்பட்ட புகைப்படங்கள் இவற்றை பெரியளவில் மக்களிடம் எடுத்துக்கூற திட்டமிட்டிருந்தேன், இதற்காக புகைப்படகண்காட்சி ஒன்றை நடத்தவே முதலில் விரும்பினேன் இருப்பினும் கொரோனா பரவல் எனது முயற்சிக்கு தடையாக இருந்ததால் தற்போது இதனை புத்தகவடிவில் கொண்டு வந்திருக்கிறேன்”என்றார்.

450 பக்கங்கள் கொண்ட இப்புத்தகத்தில் இடம்பெற்றுள்ள புகைப்படங்கள் அனைத்தும் ஒருலட்சத்திற்கும் மேலான புகைப்பட தொகுப்பில் இருந்து தேர்வு செய்யப்பட்டுள்ளதாக விஜய் ஜாலி குறிப்பிட்டார்.

மேலும் இப்புத்தகம் பிரதமரின் பயணங்களால் கிடைக்கும் நன்மைகளை சிறந்தவகையில் புரிந்துகொள்ள உதவும் எனவும் அவர் கூறினார்.

காங்கிரஸ் தலைவர் ராகுல் காந்திக்கும், ஆம்ஆத்மி ஒருங்கிணைப்பாளர் அரவிந்த் கெஜ்ரிவாலுக்கும் இந்தபுத்தகத்தை பரிசளிக்க விரும்புவதாக ஜாலி தெரிவித்தார்.

Comments are closed.