மிட்னாப்பூரில் அமித் ஷா தலைமையில் இன்று(டிச.,19) நடந்த கூட்டத்தில், சுவேந்து அதிகாரி, தபாசிமொண்டல், அசோகி திண்டா, சுதிப் முகர்ஜி, சாய்காட் பஞ்சா, ஷில் பத்ரா தத்தா, திபாலி பிஸ்வாஸ், சுக்ரா முண்டா, ஷியாமபதா முகர்ஜி, பிஸ்வஜித் குண்டு, பனஸ்ரீ மைடி உள்ளிட்ட 10 எம்.எல்.ஏ.,க்கள் ஒரு எம்.பி., மற்றும் முன்னாள் எம்.பி., ஒருவர் பா.ஜ.,வில் இணைந்தனர்.

இதனைதொடர்ந்து அமித்ஷா பேசியதாவது: மேற்குவங்க மக்களின் எதிர்காலத்துடன் மம்தா விளையாடுகிறார். மாநிலத்தில் இருந்து திரிணமுல் காங்கிரசை வேரோடு அகற்றவேண்டும். மேற்கு வங்கத்திற்கு பிரதமர் அறிவித்த திட்டங்களை மம்தா தடுக்கிறார். 2020 சட்டசபை தேர்தலில், பா.ஜ., 200க்கும் மேற்பட்ட இடங்களில் வெற்றிபெறும். மம்தா ஆட்சியில், மாநிலத்தில் வளர்ச்சி ஏதும் நடைபெறவில்லை. ஊழல், வன்முறை தலைவிரித்தாடுகிறது. மாநில அரசின் தவறான நிர்வாகத்தால், ஏழை மற்றும் விவசாயிகள் பாதிக்கப்பட்டனர். ஏழைகளிடம் இருந்து கொள்ளை யடிப்பதற்கு மம்தா வெட்கப்பட வேண்டும்.

வரும் சட்ட சபை தேர்தலில், மக்கள் திரிணமுல்லை வேரோடு சாய்ப்பார்கள். திரிணமுல் குண்டர்கள் ஏவிய வன் முறையை பார்த்து நாங்கள் பயப்படமாட்டோம். நீங்கள் தூண்டிவிடும் வன்முறை எங்களைதான் பலப்படுத்தும். மே.வங்கத்தில் பாஜ., தொண்டர்கள் கொல்லப்படுவது தொடர்கிறது. மாநிலத்தில் மாற்றம் ஏற்படுத்துவோம். மேற்குவங்கம் ஒவ்வொரு கட்சிக்கும் ஒருவாய்ப்பு வழங்கியுள்ளது. இந்த முறை பா.ஜ.,விற்கு வழங்கும். மம்தா தலைமையில் தவறான ஆட்சி நடக்கிறது. மக்கள், மம்தாவுக்கு எதிராக உள்ளனர். தேர்தல் நெருங்கும் சமயத்தில் திரிணமுல் காங்கிரசில் மம்தா தனித்து விடப்படுவார். தனது உறவினரை முதல்வராக்கும் முயற்சியில் மம்தா ஈடுபட்டுள்ளார்.

Comments are closed.