பிரான்ஸ் நாட்டின் தஸ்சால்ட் ஏவியேசன் நிறுவனத்திடம் இருந்து 126 ரபேல் போர்விமானங்கள் வாங்க இந்தியா விரும்பியது. 3 ஆண்டுகள் பேரம்பேசியும், விலை உள்ளிட்ட பல்வேறு பிரச்சினைகளால் இதில் இறுதிமுடிவு எடுக்கப்படாமல் இருந்துவந்தது. இந்நிலையில், பிரதமர் நரேந்திர மோடி  கடந்த ஆண்டு  பிரான்ஸ் சென்றார். அவர் அந்த நாட்டின் அதிபர் பிராங்கோயிஸ் ஹாலண்டேயை சந்தித்துபேசினார்.இந்த சந்திப்பின் போது அவர், பிரான்சிடம் இருந்து இந்தியா நடுத்தரமானதும், பன்முக பயன்பாடு கொண்டதுமான 36 போர் விமானங்களை, பறக்கும்நிலையில் வாங்குவதாக உறுதி அளித்தார்.  
 
இந்நிலையில், ரபேல்போர் விமானம் வாங்கும் ஒப்பந்தம் இறுதி செய்யப்பட்டு விட்டதாக கடந்த சில தினங்களாக செய்திகள் வெளியாகிவந்தன. அதேபோல்,  பாஜக தனது டுவிட்டர் பக்கத்தில், “இந்த ஒப்பந்தம்( ரபேல் போர் விமான ஒப்பந்தம்) இறுதி செய்யப்பட்டு விட்டதாகவும், பிரதமர் பேச்சு வார்த்தை நடத்தி 21 ஆயிரம் கோடி ரூபாயை சேமித்துள்ளதாகவும் கூறப்பட்டு இருந்தது. 
 
மேலும், இந்த ஒப்பந்தம்  இறுதி செய்யப்பட்ட தன் விளைவாக  தொழில்நுட்ப அறிவு கிடைத்துள்ளதாகவும், எல்லையை பாதுகாக்க வான்பலம் அதிகரித்துள்ளதாகவும்  பாஜக தனது டுவிட்டர் பக்கத்தில் தெரிவித்து இருந்தது.
 
இந்நிலையில், இதுபற்றி விளக்கம் அளித்துள்ள மத்திய பாதுகாப்புத் துறை அமைச்சர் மனோகர் பாரிக்கார், “ இந்த ஒப்பந்தம் முன்னேறிய நிலையில் உள்ளது என்பதை மட்டுமே என்னால் தெரிவிக்க இயலும். இதை இறுதிசெய்யும் நோக்கத்துடன் நாங்கள் உள்ளோம். ஒப்பந்தத்தில் கையெழுத்திடும்வரை பேச்சுவார்த்தை முழுவதுமாக நிறைவு பெற்றது என்பதை என்னால் கூற இயலாது” என்று தெரிவித்தார்.
 
ரபேல் போர் விமானம் வாங்கும் ஒப்பந்தமானது மே மாத இறுதியில்  நிறைவுக்குவரும் என்று எதிர்பார்க்கப்படுகிறது. ரபேல் விமானத்தில் விலை விவகாரத்தில் பிரான்சிடம் இந்தியா பேரத்தில் ஈடுபட்டு வருகிறது.  முதலில் வெளியான டெண்டர் படி 65 ஆயிரம் கோடி என கூறப்பட்டது. இந்தவிலையை 59 ஆயிரம் கோடி அளவுக்கு குறைக்கவேண்டும் என்று பிரான்சிடம் இந்தியா பேரம் பேசிவருகிறது. 

Leave a Reply