அடுத்த ஆண்டு நடைபெறவுள்ள உத்தரப்பிரதேச மாநில சட்டப் பேரவைத் தேர்தலில் பாஜக சார்பில் முதல்வர் வேட்பாளரை முன்னிறுத்துவது குறித்து இன்னமும் முடிவு செய்யப் படவில்லை என்று அக்கட்சியின் தேசியத்தலைவர் அமித்ஷா தெரிவித்தார்.


உத்தரப் பிரதேச மாநிலம், லக்னெளவில் சனிக்கிழமை நடைபெற்ற விழாவில் அமித்ஷா கலந்துகொண்டார்.
இந்நிலையில், மிகவும் எதிர்பார்ப்பில் உள்ள மாநில சட்டப்பேரவைத் தேர்தலில் முதல்வர் வேட்பாளராக மத்திய உள்துறை அமைச்சர் ராஜ்நாத்சிங்கோ அல்லது கட்சியின் மூத்த தலைவர் யோகி ஆதித்ய நாத்தோ முன்னிறுத்தப் படுவார்களா? என்று செய்தியாளர்கள் எழுப்பிய கேள்விக்கு அவர் அளித்த பதில்:


பாஜக என்பது தொண்டர்கள் சார்ந்தகட்சி. இங்கு உள்கட்சி ஜனநாயகம் எப்போதும் இருக்கும். குறிப்பிட்ட குடும்பத்தில் பிறந்த தனி நபரை தலைவராக்குவது எங்கள் வழக்கமல்ல. எங்கள் கட்சியில் உள்ள அனைவரும் கடுமையாக வியர்வை சிந்தி உழைக்கவேண்டும். தேர்தல் நடைபெறவுள்ள உத்தரப்பிரதேசத்தில் பாஜக ஆட்சிக்கு வந்தால் உள்கட்டமைப்பு வளர்ச்சி, இளைஞர்களுக்கான வேலை வாய்ப்புக்கான வசதிகள் மற்றும் சிறப்பான சட்டம்- ஒழுங்கு ஆகிய 3 அம்சங்களுக்கு முன்னுரிமை அளிக்கப்படும்.


செயலாக்க அடிப்படையிலான அரசியலில் பாஜகவுக்கு நம்பிக்கை உள்ளதேதவிர யாரையும் திருப்திப்படுத்தும் அரசியல் செய்வதில் இல்லை.மாநில அரசு மக்கள் நலனுக்கானதாக இருக்கவேண்டும்; குடும்பத்தினர் நலனுக்காக இருக்கக் கூடாது.ராஜஸ்தான், சத்தீஸ்கர், கோவா மற்றும் மத்தியப் பிரதேசம் ஆகிய மாநிலங்களில் நடைபெற்ற சட்டப்பேரவைத் தேர்தல்களின்போது முதல்வர் வேட்பாளராக யாரையும் அறிமுகப்படுத்தவில்லை.


எனவே இந்த உத்தரப் பிரதேச மாநிலத்தேர்தலில் யாரையாவது முதல்வர் வேட்பாளராக முன்னிறுத்தலாமா? வேண்டாமா? என்பதுகுறித்து இன்னமும் முடிவு செய்யவில்லை என்றார் அவர்.

Leave a Reply

Your email address will not be published.

This site uses Akismet to reduce spam. Learn how your comment data is processed.