ஒவ்வொரு ஞாயிற்றுக் கிழமைகளிலும் பெட்ரோல் விற்பனை நிலையங்களுக்கு விடுமுறை அளிக்கப் படுவதாகவும், இது மே மாதம் 14–ந் தேதிமுதல் நடைமுறைக்கு வர இருப்பதாகவும் தமிழ்நாடு பெட்ரோல் விற்பனை யாளர்கள் சங்கம் அறிவித்துள்ளது.

தமிழ்நாடு பெட்ரோல் விற்பனையாளர்கள் சங்கதலைவர் கே.பி.முரளி, பொதுச் செயலாளர் ஹைதர் அலி, பொருளாளர் ராமச்சந்திரன் ஆகியோர் நேற்று சென்னையில் நிருபர்களுக்கு கூட்டாகபேட்டியளித்தனர். அப்போது அவர்கள் கூறியதாவது:–

 

பிரதமர் நரேந்திர மோடி பதவியேற்றதும் மனதின்குரல் (மான் கீ பாத்) என்ற உரையில் ‘போக்கு வரத்து விதிகளிலும், எரிபொருள் சிக்கனத்திலும் மக்கள் தங்களது பங்களிப்பின் மூலம் புதியஇந்தியாவை உருவாக்கிட முடியும் என்றும், பெட்ரோல், டீசல் போன்ற எரிபொருளினை வாரத்தில் ஒருநாள் உபயோகப்படுத்தாமல், சிக்கன நடவடிக்கை மேற்கொண்டால் மேம்பட்ட இந்தியாவை உருவாக்கிட முடியும்’ என்று கூறி இருந்தார்.

 

பிரதமர் விடுத்த வேண்டுகோளினை ஏற்று பெட்ரோல் விற்பனை யாளர்களான நாங்கள், பொதுமக்கள் பெட்ரோலிய பொருட்களை வாங்குவதை குறைப்பதற்காக, ஒவ்வொருமாதமும் ஞாயிற்றுக்கிழமைகளில் பெட்ரோல் விற்பனை நிலையங்களுக்கு விடுமுறை அளித்து நாட்டிற்கு எங்களுடைய பங்களிப்பினை செலுத்த இருக்கிறோம்.

அதன்படி, அடுத்தமாதம் (மே) 14–ந்தேதி முதல் அகில இந்திய பெட்ரோலிய விற்பனை யாளர்களின் கூட்டமைப்பின் அழைப்பினை ஏற்று ஒவ்வொரு ஞாயிற்றுக் கிழமைகளிலும் விற்பனை நிலையங்கள் இயங்காது என தெரிவித்துக் கொள்கிறோம். இதன் மூலம் ஞாயிற்றுக் கிழமைகளில் தமிழகம் மற்றும் புதுச்சேரியில் உள்ள 4 ஆயிரத்து 850 பெட்ரோல், டீசல் விற்பனை நிலையங்கள் செயல்படாது. இந்தமுடிவு எங்களுடைய விளிம்புத்தொகை உயர்வு குறித்த போராட்டத்திற்கானது அல்ல.

 

உலகளவில் இந்தியா எரிபொருள்வாங்குவதில் 3–வது இடத்தில் உள்ளது. நமது நாட்டின் 21 மாநிலங்களிலும், 7 யூனியன் பிரதேசங்களிலும் நாள் ஒன்றுக்கு சுமார் 3 ஆயிரத்து 500 கோடிக்கான எரி பொருள் வாங்கப்படுகிறது. தமிழகத்தில் ஆண்டுக்கு சுமார் ரூ.56 ஆயிரம்கோடி மதிப்பிலான எரிபொருள் வாங்கப்படுகின்றது. இதில் ஒருநாள் எரிபொருள் சிக்கனத்தை மேற்கொண்டால் ரூ.153 கோடி மதிப்பிலான எரிபொருள் மிச்சப்படும்.

இந்தமுடிவின் மூலம் எதிர்கால சந்ததியினருக்கு தூய்மையான, வளமான புதிய இந்தியாவை ஒளிரச் செய்வதற்கான முயற்சியாக நாங்கள் கருதுகிறோம். இதில் தேசப்பற்றுமிக்க இந்தியனாக நாட்டை வலிமையுடன் கட்டமைக்க உதவிட ஒத்துழைப்பு நல்குமாறு அனைவரையும் கேட்டுக் கொள்கிறோம்.

விடுமுறை நாட்களில் அவசரதேவைக்கு யாருக்காவது பெட்ரோல் தேவைப் பட்டால் வழங்கப்படும். இதற்காக ஒவ்வொரு பெட்ரோல் விற்பனை நிலையங்களிலும் ஒருபணியாளர் பணியில் இருப்பார்.

இவ்வாறு அவர்கள் தெரிவித்தனர்.

Leave a Reply