விவாதத்துக்கு எடுத்துக்கொண்டால்தான்  முக்கிய மசோதாக்கள் நிறைவேற ஒத்துழைப்போம் மழைக்காலக் கூட்டத் தொடரில் முக்கியமசோதாக்களை அரசு நிறைவேற்றுவதற்கு எதிர்க்கட்சியான பா.ஜ.க நிபந்தனை விதித்துள்ளது. உணவுப்பாதுகாப்பு மசோதா மற்றும் தெலங்கானா விவகாரங்களை விவாதத்துக்கு எடுத்துக்கொண்டால்தான் அரசின் முக்கிய மசோதாக்கள் நிறைவேற ஒத்துழைப்போம் என பாஜக தெரிவித்துள்ளது.

பரபரப்பான சூழ்நிலையில் நாடாளுமன்ற மழைக்கால கூட்டத்தொடர் திங்கள்கிழமை தொடங்குகிறது. வரும் 30ஆம் தேதிவரை நடைபெற உள்ள இந்தக் கூட்டத்தொடரில், விவாதிக்கவேண்டிய விவகாரங்கள் குறித்து தில்லியில் ஞாயிற்றுக் கிழமை நடைபெற்ற தேசிய ஜனநாயகக் கூட்டணி கூட்டத்தில் ஆலோசிக்கப்பட்டது.

பா.ஜ.க மூத்த தலைவர் எல்கே.அத்வானி இல்லத்தில் நடைபெற்ற இந்த கூட்டத்தில் மக்களவை எதிர்க் கட்சி தலைவர் சுஷ்மாஸ்வராஜ், துணைத் தலைவர் ரவிசங்கர்பிரசாத், மாநிலங்களவை எதிர்க்கட்சித் தலைவர் அருண்ஜேட்லி, சிவசேனை தலைவர் சஞ்சய்ரௌத், சிரோமணி அகாலிதளம் தலைவர் சுக்தேவ்சிங் திண்ட்ஸா உள்ளிட்ட தலைவர்கள் கலந்துகொண்டனர்.

இதுதொடர்பாக பின்னர் செய்தியாளர்களிடம் ரவிசங்கர்பிரசாத் கூறியதாவது:

உணவு பாதுகாப்பு அவசரச்சட்டத்தை நாடாளுமன்றத்தில் நிறைவேற்றும் முன்பு அதில் சில திருத்தங்களை மேற்கொள்ளும்படி மத்திய அரசை வலியுறுத்த முடிவுசெய்யப்பட்டது. தற்போதைய அவசரச்சட்டத்தில் ஏராளமான குளறுபடிகள் உள்ளன. மிகவும் முக்கியத்துவம் வாய்ந்த இச்சட்டம் நம்நாட்டுக்கு அவசியம் என்பதில் கருத்துவேறுபாடு இல்லை.

ஆனால், இந்த சட்டம் தற்போதைய நிலையில் அமலுக்குவந்தால் தற்போது நடைமுறையில் உள்ள பொதுவிநியோக திட்டத்தின் நிலை என்னவாகும் என்பதற்கு திருப்தி அளிக்கக்கூடிய பதிலை மத்திய அரசால் வழங்க இயலவில்லை. உணவுப் பாதுகாப்பு சட்டத்தால் விவசாயிகளின் நலன்கள் எவ்வாறு பாதுகாக்கப்படும் என்பதை மத்திய அரசு இதுவரை தெளிவுபடுத்த வில்லை. இவை குறித்து பிரச்னை எழுப்ப தேசியஜனநாயகக் கூட்டணி முடிவுசெய்துள்ளது.

அரசுக்கு நாடாளுமன்ற கூட்டத்தொடரில் மேற்கொள்ளவேண்டிய சட்ட அலுவல்கள் ஏராளமாக உள்ளன. இத்தொடரில் 5 அவசரச்சட்டங்கள் மற்றும் 44 மசோதாக்களை நிறைவேற்ற அரசுவிரும்புகிறது. அரசுக்கு இது முக்கியம் என்றால், தேசிய முக்கியத்துவம் வாய்ந்த பிரச்னைகளில் தெளிவுஏற்படுவது எதிர்க்கட்சிகளுக்கு முக்கியம். உணவுப்பாதுகாப்பு மசோதா மற்றும் தெலங்கானா விவகாரங்களை விவாதத்துக்கு எடுத்துக் கொண்டால் தான் அரசின் முக்கிய மசோதாக்கள் நிறைவேற ஒத்துழைப்போம் என்றார் ரவிசங்கர்பிரசாத்.

Leave a Reply