பாரதீய ஜனதா நாளுக்கு நாள் வலிமைபெற்று வருகிறது நரேந்திரமோடி அலையை யாராலும் தடுத்துநிறுத்த முடியாது என்று பாஜக மூத்த தலைவர் வெங்கையா நாயுடு தெரிவித்துள்ளார்.

ஐதராபாத்தில் வெங்கையா நாயுடு நிருபர்களுக்கு அளித்த பேட்டியில் கூறியதாவது:–

பாரதீய ஜனதா நாளுக்கு நாள் வலிமைபெற்று வருகிறது. இதனால் மற்றகட்சிகள் விரக்தியும், ஏமாற்றமும் அடைந்துள்ளன. நாடு முழுவதும் மோடிக்கு ஆதரவாகவும். பா.ஜ.க.,வுக்கு ஆதரவாகவும் அலைவீசுகிறது. இதை யாராலும் தடுத்து நிறுத்தமுடியாது.

நாட்டு மக்களின் சிறப்பான எதிர் காலத்துக்காக வளர்ச்சி ஒன்றையே நோக்கமாக கொண்டு பாஜக பாடுபட்டு வருகிறது. காங்கிரஸ் கட்சியின் சகாப்தமும், பரம்பரை ஆட்சி கலாசாரமும் இந்ததேர்தலுடன் முடிவுக்கு வரும்.

பா.ஜ.க பிராந்திய கட்சி அல்ல, தேசியகட்சி. எனவே ஒட்டுமொத்த தேசத்தின் வளர்ச்சியில் அக்கறை செலுத்துவதோடு, தெலுங்கானா, சீமாந்திரா பகுதிகளின் மேம்பாட்டிலும் கவனம்செலுத்தும். பாஜக.,வால் மட்டுமே நிலையான, வலிமையான அரசை தரமுடியும் என்று மக்கள் நம்புகிறார்கள். நரேந்திர மோடியின் மூலம் இந்ததேசம் முன்னேற்றம் காணப்போகிறது.

பிராந்திய கட்சிகளுக்கு வாக்கு அளித்தால், அது காங்கிரசுக்கு உதவி செய்வதாகத் தான் அமையும். எனவே அந்த கட்சிகளுக்கு வாக்கு அளிப்பதால் எந்தபயனும் இல்லை.

பாஜக மீது காங்கிரஸ் தவறான குற்றச்சாட்டுகளை கூறிவருகிறது. தேர்தலில் நாங்கள் செலவிடும் பணம் மக்களிடம் இருந்து வசூலிக்கப்பட்டபணம் ஆகும். செலவுவிவரம் பற்றி நாங்கள் தேர்தல் கமிஷனுக்கு தெரிவிக்கிறோம். தேர்தல் கமிஷனுக்கு மட்டும் தான் நாங்கள் பதில்சொல்ல கடமைப்பட்டு இருக்கிறோம்.

நிலக்கரி சுரங்க ஒதுக்கீடு போன்ற பல்வேறு ஊழல்கள்மூலம் சட்டவிரோதமான வழிகளில் காங்கிரசுக்கு பணம் வந்துள்ளது. அந்தபணத்தை அவர்கள் தேர்தலில் செலவிடுகிறார்கள். ஆனால் பாஜக.,விடம் அப்படிப்பட்டபணம் எதுவும் இல்லை. இந்த விஷயத்தில் எங்களுடைய செயல்பாடு ஒளிவு மறைவற்றதாக உள்ளது.

பாராளுமன்ற தேர்தலில் 300க்கும் அதிகமான இடங்களில் வெற்றி பெற்று பாஜக ஆட்சியை பிடிக்கும், தெலுங்கானா மற்றும் சீமாந்திராவிலும் தெலுங்குதேசம்–பாரதீய ஜனதா கூட்டணி வெற்றி பெறும் என்று வெங்கையா நாயுடு கூறினார்.

Leave a Reply