நரேந்திர மோடியை பிரதமராக்க வேண்டும் என்ற மக்களின் விருப்பம் அதிகரித்துள்ளது என்று பாஜக. மூத்த தலைவர் அருண் ஜேட்லி தெரிவித்துள்ளார் .

இதுகுறித்து ஜேட்லி விடுத்துள்ள அறிக்கையில் கூறியிருப்பதாவது: வாரணாசியில் மோடி வேட்புமனு தாக்கல்செய்ய சென்றபோது அவருடன் சென்ற ‘மனிதக்கடல்’ ஏற்பாடு செய்யப்பட்டது அல்ல, தன்னெழுச்சியாக ஏற்பட்டது. மோடிக்கு மக்கள்மத்தியில் உள்ள ஆதரவு வெளிப்பட்டுள்ள நிலையிலும், மோடி அலை ஏதுமில்லை என்று பிரதமர் மன்மோகன் சிங் கூறுகிறார்.

இதுவரை மோடி நாடுமுழுவதும் 400-க்கு மேற்பட்ட பொதுக் கூட்டங்களில் பேசியுள்ளார். அங்கெல்லாம் திரண்ட மக்கள்கூட்டம் இதற்கு முன் கண்டிராதவை. மோடியின் பிரச்சாரம் பாஜக அணியினருக்கும், ஆதரவாளர்களுக்கும் எழுச்சியூட்டியுள்ளது. எதிர்த்தரப்பினரின் ஆத்திரமூட்டலைப் பொருட்படுத்தாமல் நல்லாட்சிக்கு செயல்திட் டத்தை வகுத்து உரையாற்றுவது தெளிவாகத் தெரிகிறது.

வடக்கு, மேற்கு, மத்திய இந்தியாவில், பா.ஜ.க.,வுக்கு கணிசமான ஆதரவுதளம் உள்ளதால் அங்கெல்லாம் மோடி அலை தென்படுவது எதிர்பார்க்கப்பட்ட ஒன்று. அதேநேரத்தில் தெற்கு மற்றும் கிழக்குப் பகுதிகளில் அவர் மீது ஏற்பட்டுள்ள மிகப்பெரும் நல்லெண்ணம் பாஜகவுக்கு கிடைக்கும் வாக்குகளை பெருமளவு அதிகரிக்க வழிவகுத்துள்ளது.

காங்கிரஸ் தலைவர்கள் தங்களது ஆட்சியின் சாதனைகளைக் கூறி ஆதரவு திரட்டுவதற்கு மாறாக எதிர்மறைப் பிரச்சாரம் செய்துவருகின்றனர் என்று ஜேட்லி கூறியுள்ளார்.

Leave a Reply