ஆர்எஸ்எஸ். தலைவர் மோகன் பாகவத்தின் பேச்சு தூர்தர்ஷனில் ஒருமணி நேரம் நேரலையாக ஒளிபரப்பப்பட்டதற்கு காங்கிரஸ், இடதுசாரிகள் எதிர்த்துள்ளதை பாஜக வன்மையாக கண்டித்துள்ளது.

இதுகுறித்து பாஜக செய்தித் தொடர்பாளர் ஷைனா என்.சி. கூறுகையில், "ஆர்.எஸ்.எஸ். ஒருதேசியவாத இயக்கம். "தேசம் தான் முதலில்' என்பதிலும், எந்த தனி நபரின் நலனை விட தேசம் தான் முக்கியம் என்பதிலும் அது நம்பிக்கை கொண்டுள்ளது. மோகன் பாகவத்தின் உரை தூர்தர் ஷனில் நேரலையாக ஒளிபரப்பப் பட்டது மிகவும் மகிழ்ச்சியாக உள்ளது.

தேசப்பற்றிலும், நாட்டை கட்டமைப் பதிலும் உண்மையாக பங்களிப்புசெய்யும் இயக்கம் இன்று இருக்குமானால் அது ஆர்எஸ்எஸ் தான் என்று மக்கள் உணர்கின்றனர்' என்றார்.

ஆர்எஸ்எஸ் தலைவர் மோகன்பாகவத்தின் உரையை தூர்தர் ஷன் நேரடியாக ஒளிபரப்பியதை எதிர்க் கட்சிகள் விமர்சித்ததற்கு மத்திய தகவல் ஒலிபரப்புத் துறை அமைச்சர் பிரகாஷ் ஜாவடேகர் எதிர்ப்பு தெரிவித்துள்ளார்.

இதுகுறித்து அவர் மும்பையில் செய்தியாளர்களிடம் கூறியதாவது: நிகழ்ச்சிகளை ஒளிபரப்புவது தொடர்பாக பிரசார்பாரதி அமைப்பு சொந்தமாக முடிவெடுக்கிறது. அப்படி இருக்கும் போது, செய்தி முக்கியத்துவம் வாய்ந்த நிகழ்ச்சியான ஆர்.எஸ்.எஸ் தலைவரின் உரையை தூர்தர்ஷன் ஒளிபரப்பியதற்கு ஆட்சேபம் தெரிவிக்கப்படுவது ஏன்? இந்த நிகழ்ச்சியை தனியார் தொலைக் காட்சிகளும் ஒளிபரப்பியுள்ளன. எனவே இதை தூர்தர்ஷன் ஏன் காட்டக்கூடாது?

ஆர்.எஸ்.எஸ் தலைவரின் உரையை, முந்தயை ஆட்சியாளர்கள் விதித்த கட்டுப்பாடு காரணமாக கடந்தகாலங்களில் தூர்தர்ஷன் நேரடியாக ஒளிபரப்பாமல் இருந்திருக்கலாம். காங்கிரஸ் உள்ளிட்ட கட்சிகளின் தலைவர்களது உரைகளை "தூர்தர்ஷன் செய்தி ' தொலைக் காட்சி நேரடியாக ஒளிபரப்புகிறது. அப்போது அது குறித்து யாரும் பேசுவதில்லை என்றார் பிரகாஷ் ஜாவடேகர்.

"இதர செய்திகளைப் போன்றுதான் மோகன் பாகவத் பங்கேற்றசெய்தியும் ஒளிபரப்பப்பட்டது' என்று தூர்தர்ஷன் தலைமை இயக்குநர் அர்ச்சனா தத்தா விளக்க மளித்துள்ளார்.

Leave a Reply