தமிழகத்தில் அதிமுக.வினர் நடத்திய சில போராட்டங்களால் மக்களிடமிருந்த அனுதாபம் போய்விட்டது. அ.தி.மு.க.வினர் செய்வதை போலீசார் கைகட்டி வேடிக்கை பார்த்துவருவதால் அ.தி.மு.க.வுக்கு எதிர்ப்பு அலைதான் உருவாகியுள்ளது என்று பா.ஜ.க.,வின் மூத்த தலைவர் இல.கணேசன் கூறியுள்ளார்.

ஈரோடு மாவட்டம் கோபியில் இன்று செய்தியாளர்களிடம் பேசிய இல கணேசன் கூறியதாவது: சொத்து குவிப்புவழக்கில் அதிமுக. பொதுச்செயலாளர் ஜெயலலிதா தண்டனைபெற்று சிறையில் இருந்துவருகிறார். இது வருத்த மளிக்கிறது. ஆனால் இந்தவழக்கு 18 ஆண்டுகளாக நடந்து தண்டனை கொடுக்கப்பட்டதால் தமிழகமக்களிடம் ஒரு அனுதாபம் இருந்தது.

அதே நேரத்தில் தமிழகத்தில் அ.தி.மு.க.வினர் நடத்திய சில போராட்டங்களால் மக்களிடம் இருந்த அனுதாபம் போய்விட்டது. சட்டம்-ஒழுங்கை காப்பாற்றுவது அ.தி.மு.க. அரசுதான். தற்போது அ.தி.மு.க.வினர் செய்வதை போலீசார் கைகட்டி வேடிக்கை பார்த்து வருகிறார்கள். இதனால் அ.தி.மு.க.வுக்கு எதிர்ப்பு அலைதான் உருவாகும். அனுதாபம் உருவாகாது.

கர்நாடக அரசு இந்த சொத்துகுவிப்பு வழக்கை நாங்கள் நடத்துகிறோம் என்று கேட்டு பெறவில்லை. இங்கிருந்துதான் கர்நாடக மாநிலத்துக்கு வழக்கு மாற்றப்பட்டுள்ளது. தமிழகத்தில் சில அதிமுக.வினர், கர்நாடக மக்களை பற்றிபேசுவதையும், சுவரொட்டி மூலம் சித்தரித்து வருவதையும் பா.ஜ.க கண்டிக்கிறது.

இந்தசெயலில் ஈடுபடுவோர் மீது இந்த அரசு நடவடிக்கை எடுக்கவேண்டும். ஆனால் தொடர்ந்து அதிமுக.வினர் இது போன்ற போராட்ட செயல்களில் ஈடுபட்டால் மக்களிடம் மதிப்பை இழப்பார்கள். இலங்கை பிரச்சினையில் பாஜக அரசு சரியாக செயல் பட்டு வருகிறது. காங்கிரஸ் ஆட்சியில்தான் தமிழக மீனவர்கள், இலங்கை கடற்படையினரால் சிறை பிடிக்கப்பட்டு, சித்ரவதை செய்யப்பட்டு கொல்லப் பட்டனர். பாஜக ஆட்சியில் சிறைபிடிக்கப்பட்ட தமிழக மீனவர்கள் 7 நாட்களில் விடுதலை செய்யப்பட்டு வருகிறார்கள். மீனவர் பிரச்சினை என்பது தொழில்ரீதியான பிரச்சினை ஆகும். இதனால் நாங்கள் மீனவர் பிரச்சினை குறித்து பேசிகொண்டு இருக்கிறோம். விரைவில் இதற்கு சுமூகதீர்வு கிடைக்கும் என்றும் இல.கணேசன் கூறினார்.

Leave a Reply