பாட்னா: ஜார்க்கண்ட் சட்டசபைத் தேர்தலில் வெற்றிபெற்ற பாஜக., அடுத்ததாக, பீகாரில் வெற்றிக் கொடி நாட்ட வேண்டும் என்பதில், தீவிரமாக களம் இறங்கியுள்ளது .

லோக்சபா தேர்தலில், பா.ஜ.க, பெருவெற்றிபெற காரணமாக இருந்த மோடி அலை, இன்னும் ஓயவில்லை என்பதை நிரூபிப்பதுபோல, சமீபத்திய சிலமாதங்களில், மகாராஷ்டிரா, அரியானா மற்றும் ஜார்க்கண்ட் மாநிலங்களில் நடைபெற்ற சட்ட சபைத் தேர்தல்களில், பா.ஜ., வெற்றிபெற்று ஆட்சியை பிடித்தது. அத்துடன், ஜம்மு – காஷ்மீரிலும், அதிக இடங்களில் வெற்றிபெற்றது.

இதையடுத்து, பாஜக., தலைவர் அமித்ஷா மற்றும் பிரதமர் நரேந்திர மோடியின் அடுத்த இலக்கு, பீகார் மாநிலமாக உள்ளது. இந்த ஆண்டு அக்டோபரில், பீகாரில் சட்ட சபைத் தேர்தல் நடைபெற உள்ளது. இந்ததேர்தலில், பாஜக., வெற்றிபெற்றால், இந்திபேசும் மாநிலங்களில், பாஜக.,வின் ஆதிக்கம் அதிகரிக்கும்.
அத்துடன், லோக் சபா தேர்தலுக்கு முன், பாஜக.,வின் பிரதமர் வேட்பாளராக, நரேந்திர மோடி அறிவிக்கப்பட்டதற்கு எதிர்ப்பு தெரிவித்து, தே.ஜ., கூட்டணியிலிருந்து விலகி விராப்பு பேசிய , பீகார் மாநில முன்னாள் முதல்வர் மற்றும் ஐக்கிய ஜனதா தளம் கட்சியின் மூத்த தலைவர் நிதிஷ்குமாருக்கு பதிலடி தந்ததை போன்றாகிவிடும் .

இது குறித்து பீகார் மாநில முன்னாள் துணை முதல்வரும், பாஜக., மூத்த தலைவருமான, சுஷில்குமார் மோடி கூறியதாவது: பீகாரில், பாஜக.,வை ஆட்சியில் அமரவைக்க வேண்டும் என்பதில், எங்கள் கட்சியின் தேசியதலைவர், அமித்ஷா தீவிரமாக உள்ளார். அதற்கான பணிகளில் அக்கறை காட்டி வருகிறார். சமீபத்தில், பீகார் பாஜக.,வின் உயர்மட்ட குழு கூட்டத்தைகூட்டி ஆலோசித்தார்.

அத்துடன், வரும் 23ம்தேதி, பாட்னா நகருக்கு விஜயம்செய்து, கட்சியினருடன் சட்டசபைத் தேர்தல் தொடர்பாக விவாதிக்க உள்ளார். ஏப்., 14ம் தேதி, பாட்னா காந்தி மைதானத்தில் நடை பெறும், பிரமாண்ட பொதுக் கூட்டத்திலும் பேசுகிறார். இவ்வாறு, சுஷில்குமார் கூறினார்.

Leave a Reply