போலி நிறுவனங்களிட மிருந்து ரூ.2 கோடி நிதிபெற்றிருப்பதன் மூலம் ஆம் ஆத்மி கட்சி கருப்புப் பண முறைகேட்டில் ஈடுபட்டிருப்பது வெட்டவெளிச்சமாகியுள்ளது என்று மத்திய நிதி அமைச்சர் அருண் ஜேட்லி குற்றஞ்சாட்டி உள்ளார்.

ஆம் ஆத்மி கட்சியில் இருந்து பிரிந்துசென்ற ஏ.ஏ.பி. தன்னார்வ நடவடிக்கைக் குழு (ஆவாம்) என்ற அமைப்பு, ஆம் ஆத்மி கட்சி கடந்த ஆண்டு நான்குபோலியான நிறுவனங்கள் மூலம் ரூ.2 கோடி நிதி பெற்றதாக புகார் கூறியிருந்தது.

இந்நிலையில் மத்திய நிதி அமைச்சர் அருண்ஜேட்லி இதுகுறித்து கூறும்போது, ''நான்கு போலியான நிறுவனங்களின் பெயரில் தலா ரூ.50 லட்சம் காசோலைகளின் மூலம் ஆம் ஆத்மி ரூ.2 கோடி நிதி பெற்றதன் மூலம் அந்தக்கட்சி நிதி முறைகேட்டில் ஈடுபட்டிருப்பது அம்பலமாகியுள்ளது.

இது அரசியல் அமைப்பை பயன் படுத்தி கருப்பு பணத்தை கை மாற்றிவிடும் நடவடிக்கையாகும். ஹவாலா பணத்தை வெள்ளையாக மாற்றுவதற்கு இந்தப்போலி நிறுவனங்கள் ஒரு வழித்தடமாகப் பயன்படுத்தப்பட்டுள்ளன.

இது போன்ற குற்றச்சாட்டில் சிக்கிய ஒவ்வொருவரும், பிரச்னையை திசைதிருப்புவதற்காக மற்ற அரசியல் கட்சிகள் மீது புகார் கூறுவர். இதைப்போலவே, மூன்று முக்கிய கட்சிகளின் நிதி ஆதாரம் குறித்து விசாரணை கோருவதன் மூலம் பிரச்னையை திசை திருப்பும் தந்திரத்தை ஆம் ஆத்மி கையாளுகிறது.

இந்த விவகாரம் சட்ட அமைப்புகளின் கவனத்திற்குச் செல்லும் போது, அதிகாரிகள் தங்களது கடமையைச் செய்வார்கள் என்று உறுதியளிக்கிறேன். மேலும், போலி நிறுவனங்களின் பின்னணியில் இருப்பது யார்? அவர்களுடைய நிதி ஆதாரம் என்ன? என்பதுகுறித்து ஆம் ஆத்மி கட்சி விளக்கம் அளிக்க வேண்டும்" என்று தெரிவித்துள்ளார்.

Leave a Reply