அதிமுக-பாஜக இடையே நட்பு எதுவும் இல்லை என்று பாஜக தேசிய பொதுசெயலாளர் முரளிதர் ராவ் கூறியுள்ளார்.

பாஜக தேசிய பொதுசெயலாளர் முரளிதர் ராவ், சென்னை தியாகராய நகரில் உள்ள பாஜக மாநில தலைமையகமான கமலாலயத்தில் நேற்று செய்தியாளர்களுக்கு பேட்டியளித்தார்.

அப்போது முரளிதர்ராவ் கூறியதாவது:-

தமிழக மீனவர்கள் பிரச்சினையை பாஜக உன்னிப்பாக கவனித்துவருகிறது. மீனவர்கள் கொல்லப் படுவதை தடுக்கவும், கைது செய்யப்பட்ட மீனவர்களையும், கைப்பற்றப் பட்ட படகுகளையும் விடுவிக்கவும் தேவையான நடவடிக்கை எடுக்கப்பட்டுவருகிறது.

விரைவில், தமிழக மீனவர் பிரச்சினைக்கு தீர்வுகாணப்படும். தமிழக மீனவர் பிரச்சினை தொடர்பாக, தமிழக பாஜக சார்பில் டெல்லியில் 27ம் தேதி கருத்தரங்கம் நடைபெறுகிறது. இதில், தமிழக மீனவ பிரதிநிதிகள் பங்கேற்று தங்களது கருத்துக்களை தெரிவிக்க உள்ளனர்.

இறுதியில் கூட்டத்தில் எடுக்கப்பட்ட முடிவுகுறித்து, 29ம் தேதி மத்திய அமைச்சர் சுஷ்மா சுவராஜை மீனவபிரதிநிதிகள் சந்தித்து தெரிவிப்பார்கள். இவ்வாறு முரளிதர் ராவ் கூறினார். பின்னர் செய்தியாளர்கள் கேட்டகேள்விகளும், அதற்கு முரளிதர் ராவ் பதிலளித்தார்.

கேள்வி:- ஆந்திராவில் 20 தமிழக தொழிலாளர்கள் சுட்டுக் கொல்லப்பட்டது குறித்து?

பதில்:- அந்த சம்பவத்திற்கு பாஜக கடும்கண்டனம் தெரிவித்துள்ளது. ஆந்திர காவல் துறையினர் தற்காப்புக்காக கொலை செய்ததாக கூறுவது நம்பும் படியாக இல்லை. உண்மையான குற்றவாளிகள் தண்டிக்கப்பட்டதாக நாங்கள் நினைக்க வில்லை. இந்த விஷயத்தில் ஆந்திர அரசு தெளிவான நிலைப் பாட்டை எடுக்க வேண்டும்.

கேள்வி:- மேகதாது குறுக்கே அணை கட்ட கர்நாடக அரசு முயன்று வருகிறதே?

பதில்:- மேகதாதுவில் அணைகட்ட கர்நாடக அரசு மத்திய சுற்றுச் சூழல் அமைச்சகத்திடம் எந்த அனுமதியும் பெறவில்லை. இதுதொடர்பாக, தமிழக விவசாயிகள் கொண்டுள்ள கவலையில் நியாயம் உள்ளது. பாஜக சரியான நிலைப் பாட்டை எடுக்கும்.

கேள்வி:- நிலம் கையகப்படுத்தும் மசோதாவை பாஜக வில் உள்ள கூட்டணி கட்சிகளே எதிர்த்த நிலையில் அதிமுக ஆதரித்துள்ளதே?

பதில்:- அதில் உள்ள நன்மைகருதி அதிமுக ஆதரித்தது. பாஜக கூட்டணியில் உள்ள சிவசேனா உள்ளிட்ட கட்சிகளே எதிர்ப்புதெரிவித்த நிலையில், அதிமுக ஆதரித்தது. இருந்தாலும், அதிமுக – பாஜக இடையே நட்பு எதுவும்கிடையாது. எங்கள் கூட்டணியிலும் அவர்கள் இல்லை. இவ்வாறு முரளிதர் ராவ் கூறினார்.

Leave a Reply