போலிச் சான்றிதழ் விவகாரத்தில் சிக்கியுள்ள தில்லி சட்டத்துறை அமைச்சர் ஜிதேந்தர் சிங் தோமரை பதவி நீக்கம் செய்யக் கோரி, முதல்வர் அரவிந்த் கேஜரிவால் இல்லம் முன்பு தில்லி பாஜக.,வினர் புதன் கிழமை ஆர்ப்பாட்டத்தில் ஈடுபட்டனர்.

தில்லி பாஜக தலைவர் சதீஷ் உபாத் யாய் தலைமையில் நடைபெற்ற இந்த ஆர்ப்பாட்டத்தில் ஏராளமான பாஜக தொண்டர்கள் பங்கேற்றனர். இந்த ஆர்ப்பாட்டத்தில் சதீஷ் உபாத்யாய் பேசியதாவது:

மக்களை முட்டாள்களாக்க தில்லி அரசு நினைக்கிறது. போலி சான்றிதழை கொண்ட தில்லி சட்ட அமைச்சருக்கு எதிராக சாலையில் இறங்கி போராடுகிறோம். இது தொடர்பாக சட்ட ரீதியான நடவடிக்கை எடுப்பதுடன், தேவையேற்பட்டால் வழக்குப்பதிவும் செய்வோம்.

இந்த விவகாரத்தை மக்கள் முன் எழுப்பியுள்ளோம். ஜிதேந்தரசிங் தோமர் பதவி நீக்கம் செய்யப்படாதவரை எங்கள் போராட்டத்தை தொடருவோம். இதுபோன்ற அராஜகத்தை அனுமதிக்க இயலாது.

லஞ்ச விவகாரத்தில் அரவிந்த் கேஜரிவால் இரட்டைநிலையை கடைப்பிடிக்கிறார். அரசு அதிகாரிகள் ஊழல்வாதிகளாக இருப்பதாகக் கூறுகிறார். அனைத்து அதிகாரிகள் மீதும் அவர் குறை கூறுகிறாரா?

தெற்கு தில்லி மாநகராட்சி பொறியாளரை பணி செய்ய விடாமல் தடுத்து, அவரைத் தாக்கிய ஆம் ஆத்மி எம்எல்ஏ ஜர்னயில் சிங்குக்கு எதிராக பதிவுசெய்யப்பட்ட வழக்கின் நிலை என்ன? அரவிந்த் கேஜரிவால் முதலில் தனது கட்சியில் உள்ள நேர்மை யின்மையை சரிசெய்ய வேண்டும் என்று சதீஷ் உபாத்யாய் கூறினார்

Leave a Reply