பிரதமர் நரேந்திரமோடியின் ராமேஸ்வரம் வருகையை முன்னிட்டு இருதினங்களுக்கு வெளியூரில் இருந்து ராமேஸ்வரத்திற்கு சாலைவழியாக  வாகனங்களில் வருவதை தவிர்க்குமாறு மாவட்ட காவல் கண்காணிப்பாளர் ஓம் பிரகாஷ் மீனா அறிவுறுத்தி உள்ளார்.


ராமேஸ்வரம் அருகே  உள்ள பேய்கரும்பு என்ற இடத்தில் கட்டப் பட்டுள்ள அப்துல் கலாம் தேசிய நினைவகத்தினை அப்துல் கலாமின் 2-ம் ஆண்டு நினைவுதினமான ஜூலை 27-ம் தேதி பிரதமர் நரேந்திரமோடி திறந்துவைக்க உள்ளார். இந்நிகழ்சியில் பிரதமருடன், மத்திய அமைச்சர்கள்,  தமிழக முதல்வர் எடப்பாடிபழனிசாமி உள்ளிட்ட பல்வேறு மாநில முதல்வர்கள், மாநில அமைச்சர்கள் மற்றும் முக்கியபிரமுகர்களும் பங்கேற்க உள்ளனர்.

மேலும் அதே நாளில் ராமேஸ்வரம் ராமநாத சுவாமி திருக்கோயில் ஆடித்திருவிழாவின் முக்கிய நிகழ்வான சுவாமி அம்பாள் மாலை மாற்றும் நிகழ்ச்சி ராமர்தீர்தம் தபசு மண்டபகப் படியில் நடக்க உள்ளது. இதனை முன்னிட்டு காலை 6 மணிமுதல் மாலை 5.30 மணிவரை திருக்கோயிலின் நடைசாத்தப்படவும் உள்ளது. 

எனவே, மேற்கண்ட இருநிகழ்ச்சிகளையும் முன்னிட்டு வெளியூர், வெளிமாவட்டம் மற்றும் வெளி மாநிலங்களில் இருந்து வரும் பக்தர்கள், சுற்றுலாப்பயணிகள் மற்றும் பொது மக்கள் ஜூலை 26 மற்றும் 27 ஆகிய இரு தினங்களிலும் காலை 9 மணி முதல் பிற்பகல் 2 மணிவரை சாலை மார்க்கமாக ராமநாதபுரத்தில் இருந்து ராமேஸ்வரத்திற்கோ அல்லது ராமேஸ்வரத்தில் இருந்து ராமநாத புரத்திற்கோ செல்வதை தவிர்க்குமாறு மாவட்டக் காவல் கண்காணிப்பாளர் ஓம்பிரகாஷ் மீனா முன்னெச்சரிக்கை அறிவிப்பை வெளியிட்டுள்ளார்.

Leave a Reply