மராட்டியத்தில் முதல் முறையாக பாஜக அரசு அமைய உள்ள நிலையில், பாஜக.,வை சேர்ந்த 44 வயது தேவேந்திர பட்னாவிஸ் இன்று புதிய முதல்வராக பதவி ஏற்கிறார். இந்த விழாவில் பிரதமர் , அமித்ஷா, அத்வானி உள்ளிட்ட தலைவர்கள் பங்கேற்கிறார்கள்.

288 தொகுதிகளை கொண்ட மராட்டிய சட்ட சபைக்கு கடந்த 15ந் தேதி தேர்தல் நடந்தது. இந்ததேர்தலில் பா.ஜ.க 122 தொகுதிகளை பெற்று தனிப் பெரும் கட்சியாக திகழ்கிறது. ஆனால் ஆட்சியமைக்க 145 இடங்கள் தேவை என்பதால், கூட்டணி ஆட்சி அமைக்க தனது பழைய நட்புகட்சியான சிவ சேனாவுடன் நடந்து வரும் பேச்சுவார்த்தையில், இதுவரை உடன்பாடு ஏற்படவில்லை. இதனால் பா.ஜனதா தனித்து அரசை அமைக்க முன்வந்தது. பாஜக சார்பில் முதல்-மந்திரியாக நாக்பூரை சேர்ந்த 44 வயது தேவேந்திர பட்னாவிஸ் தேர்ந்தெடுக்கப்பட்டார்.

இந்நிலையில் முதல்-மந்திரி பதவி ஏற்புவிழா இன்று (வெள்ளிக்கிழமை) மாலை 4.30 மணிக்கு மும்பை வான்கடே மைதானத்தில் கோலா கலமாக நடைபெற உள்ளது. மராட்டிய அரசியல் வரலாற்றில் 1995-ம் ஆண்டு சிவசேனா – பா.ஜ.க இணைந்து , காங்கிரஸ் அல்லாத கூட்டணி அரசை அமைத்தன. அப்போது சிவசேனா தலைமையில் அந்த அரசு அமைந்தது. ஆனால் தற்போது முதல் முறையாக பா.ஜ.க ஆட்சி அமைக்கிறது. இது மராட்டியத்தில் காங்கிரஸ் அல்லாத 2வது அரசு ஆகும்.

சிவசேனாவுடன் கூட்டணி உடன்பாடு ஏற்படாததால், பதவி ஏற்புவிழாவில் அக்கட்சி சார்பில் யாரும் மந்திரியாக பதவி ஏற்க வாய்ப் பில்லை என்று பா.ஜ.க பொதுச் செயலாளர் ராஜீவ் பிரதாப்ரூடி நிருபர்களிடம் தெரிவித்தார். வரும் நாட்களில் அரசில் சிவ சேனா பங்கேற்கும் என்று பா.ஜ.க நம்புகிறது. அப்போது மந்திரி சபையை முழுமையான அளவில் விரிவாக்கம்செய்ய அக்கட்சி திட்டமிட்டு உள்ளது.

பதவி ஏற்புவிழா பிரமாண்டமாக நடைபெறுகிறது. இதற்காக வான்கடே கிரிக்கெட் மைதானம் விழாக் கோலம் பூண்டுள்ளது. விழாவில் பிரதமர் நரேந்திர மோடி, பா.ஜ.க தலைவர் அமித்ஷா, மூத்த தலைவர் எல்.கே. அத்வானி, ஆர்.எஸ்.எஸ். தலைவர் மோகன்பகவத் மற்றும் பல மத்திய மந்திரிகள், பா.ஜனதா ஆளும் முதல்-மந்திரிகள், இந்தி திரைப்பட நட்சத்திரங்கள், பிரபல தொழில் அதிபர்கள் பங்கேற்கிறார்கள். 5 ஆயிரம் பேருக்கு சிறப்பு இருக்கைகள் ஒதுக்கப்பட்டுள்ளன. மேலும் 30 ஆயிரம் பேருக்கு அழைப்பிதழ்கள் அனுப்பப்பட்டு உள்ளன.

வான்கடே மைதானம் போலீஸ் பாதுகாப்பு வளைய த்துக்குள் கொண்டு வரப்பட்டுள்ளது. அங்கு பாதுகாப்பு பணியில் 2,500 போலீசார் ஈடுபடுத்தப்பட உள்ளனர். பாதுகாப்பு ஏற்பாடுகள் குறித்து மும்பை மாநகரபோலீஸ் கமிஷனர் ராகேஷ் மரியா வான்கடே கிரிக்கெட் மைதானத்தில் ஆய்வுபணியை மேற்கொண்டார். முக்கிய பிரமுகர்கள் விழாவில் கலந்து கொள்வதால், மைதானத்தில் வெடிகுண்டு நிபுணர்கள் தீவிரமாக சோதனை நடத்தி வருகிறார்கள். மோப்பநாய்களும் இந்த பணியில் ஈடுபடுத்தப்பட்டு வருகின்றன. மும்பை நகரின் எல்லைப் பகுதியில் போலீசார் தடுப்பு வேலிகளை அமைத்து இரவு&பகலாக தீவிர வாகன சோதனையில் ஈடுபட்டு வருகிறார்கள்.

Leave a Reply

Your email address will not be published.

This site uses Akismet to reduce spam. Learn how your comment data is processed.