மத்திய அரசை ஆர்எஸ்எஸ் நிர்பந்திக்கவில்லை என்று மத்திய அமைச்சர் நிதின் கட்கரி தெரிவித்தார்.

இதுதொடர்பாக செய்தியாளரிடம் கூறியதாவது:

மத்திய அமைச்சர்கள் மனோகர் பாரிக்கர், ராஜ்நாத் சிங் ஆகியோரும், நானும் ஆர்எஸ்எஸ் அமைப்பில் செயல் உறுப்பினர்களாவோம். நான் தற்போதும் ஆர்எஸ்எஸ் அமைப்பின் உறுப்பினர்தான். இதை தெரிவிப்பதில் எனக்கு எந்த தயக்கமும் கிடையாது.

ஆர்எஸ்எஸ் தலைவர் மோகன் பாகவத்து டனான எங்களது சந்திப்பின் போது, பல்வேறு விவகாரங்கள் குறித்து பேசினோம். ஆர்எஸ்எஸ் அமைப்பு எனது வாழ்க்கையின் ஒருபகுதியாகும். இதேபோல் தான், பாரிக்கர், ராஜ்நாத்சிங் ஆகியோருக்கும். மோடி அரசுக்கு, ஆர்எஸ்எஸ் அமைப்பிடம் இருந்து எந்தநிர்பந்தமும் அளிக்கப்படவில்லை.

மோடி அணிந்த மேல்சட்டையின் விலை ரூ.15 லட்சம் என சிலர் தெரிவிக்கின்றனர். அதற்கான பணத்தை அவர்களா செலுத்தினார்கள்? எங்கு செலுத்தினார்கள்? ராகுல் காந்தி செலுத்தினாரா? ஆர்எஸ்எஸ் அமைப்பின் பிரசாரகராக மோடி இருந்தபோதில் இருந்து அவருடன் தொடர்பில் இருந்த குஜராத்தைச் சேர்ந்த ஒரு குடும்பத்தினர்தான், மோடிக்கு அந்த மேல்சட்டையை பரிசாக அளித்தனர் என்றார் நிதின் கட்கரி.

மத்திய அரசில், பிரதமர் நரேந்திர மோடி மட்டுமே அனைத்து முடிவுகளையும் எடுப்பதாக எழுந்துள்ள குற்றச்சாட்டு குறித்த கேள்விக்கு நிதின் கட்கரி பதிலளிக்கையில், "பாஜக ஜனநாயகக் கட்சியாகும். கட்சிக்கு தலைவர் இருக்கிறார். அவரும் சிறந்த அனுபவமிக்கவராவார். ஆதலால், ஒரு நபரால் அதிகாரம் செலுத்த முடியாது. மத்திய அமைச்சரவைக் கூட்ட விவாதங்களின்போது, அமைச்சர்கள் சுதந்திரமாக கருத்துகளை தெரிவிக்கின்றனர்' என்றார்.

மகாராஷ்டிர மாநிலம், நாகபுரியில் ஆர்எஸ்எஸ் தலைவர் மோகன் பாகவத்தை மத்திய உள்துறை அமைச்சர் ராஜ்நாத் சிங், மனோகர் பாரிக்கர், நிதின் கட்கரி ஆகியோர் அண்மையில் சந்தித்துப் பேசினர். இதேபோல், பாஜக தலைவர் அமீத் ஷாவும் மோகன் பாகவத்தை சந்தித்துப் பேசினார்.

Leave a Reply