வரும் 15ம் தேதி நாடுமுழுவதும் பி.எஸ்.என்.எல்.,லுக்கு இலவச ரோமிங் என மத்திய அமைச்சர் ரவிசங்கர் பிரசாத் அறிவித்துள்ளார்.

மோடி தலைமையிலான அரசின் ஓராண்டு சாதனைகள் குறித்து செய்தியாளர்களிடம் மத்திய தொலைத்தொடர்பு துறை அமைச்சர் ரவிசங்கர் பிரசாத் விளக்கினார். அப்போது கூறுகையில், ''பிஎஸ்என்எல் நிறுவன மொபைல் இணைப்பு வைத்திருப் பவர்களுக்கு நாடுமுழுவதும் வரும் 15ம் தேதி முதல் இலவசரோமிங் சலுகை அளிக்கப்படுகிறது. நாடுமுழுவதும் விரும்பிய எந்த நிறுவனத்துக்கும் மொபைல் எண்ணை மாற்றிக் கொள்வதற்கான தேசிய எம்என்பி (மொபைல் நம்பர் போர்டபிளிடி) அடுத்த மாதத்தில் அமலாகிறது.

கடந்த நிதியாண்டில் பிஎஸ்என்எல் வருவாய் 2.1 சதவீதம் அதிகரித்துள்ளது. நான் பொறுப்பேற்கும் போது பிஎஸ்என்எல் ₹7,500 கோடி இழப்பை சந்தித்திருந்தது. இதுபோல் எம்.டி.என்.எல்.,லும் இழப்பில் தான் இருந்தது. இவற்றை லாபகரமாக்க முயற்சிகள் மேற்கொள்ளப்படும். அடுத்த 2 ஆண்டுகளில் முக்கிய சுற்றுலாதலங்களில் பிஎஸ்என்எல் மூலம் இலவச வை-பை வசதி அளிக்கப்பட உள்ளது'' என்றார்.

பிஎஸ்என்எல் முதன்மை நிர்வாக இயக்குனர் அனுபம் வத்சவா கூறுகையில், '' இலவச ரோமிங் கால் வருவாய் குறையும் எனினும், பி.எஸ்.என்.எல் சந்தாதாரர்கள் வேறு நிறுவனங்களுக்கு மாறுவதை தடுத்து, புதிய வாடிக்கை யாளர்களை ஈர்க்க உதவும்'' .

இந்த இலவசரோமிங் ஓராண்டுக்கு இருக்கும். மார்ச் இறுதி நிலவரப்படி 7.72 கோடி பிஎஸ்என்எல் மொபைல் சந்தாதாரர்கள் உள்ளனர். தற்போது மாநில அளவில் ஒவ்வொரு தொலைத் தொடர்பு வட்டத்துக்குள் மட்டும் ஒருநிறுவனத்தில் இருந்து மற்றொரு நிறுவன சேவைக்கு மொபைல் சந்தாதாரர்கள் மாறிக்கொள்ளும் வசதி உள்ளது. நாடுமுழுவதுமான எம்.என்.பி வசதி அறிமுகப்படுத்தப்படுவதன் மூலம், நாட்டின் எந்தபகுதிக்கு சென்றாலும், மொபைல் எண்ணை மாற்றாமலேயே அங்குள்ள தொலைத் தொடர்பு நிறுவனங்களின் சேவைக்கு மாறிக்கொள்ள முடியும்.

Leave a Reply