நாட்டுக்காகவும், ஏழைகளின் நலனுக்காகவும் அர்ப்பணிப்புடன் சேவையாற்றும்  தேசத்தின் புகழ்பெற்ற தலைவருக்கு பிறந்தநாள் வாழ்த்துகள் என்று பிரதமர் மோடிக்கு 70-வது பிறந்த நாள் வாழ்த்துகளை உள்துறை அமைச்சர் அமித் ஷா தெரிவித்துள்ளார்.

பிரதமர் மோடிக்கு இன்று 70-வது பிறந்தநாளாகும். இதையடுத்து, பாஜக தலைவர்கள், நிர்வாகிகள், மத்திய அமைச்சர்கள் பலர் வாழ்த்துக்களை தெரிவித்து வருகின்றனர். குடியரசுத்தலைவர் ராம்நாத் கோவிந்த், உள்துறை அமைச்சர் அமித்ஷா, காங்கிரஸ் முன்னாள் தலைவர் ராகுல்காந்தி உள்ளிட்ட பலரும் வாழ்த்துக்களை தெரிவித்துள்ளனர்.

பாஜக சார்பில் மோடியின் பிறந்தநாளையொட்டி நாடுமுழுவதிலும் செப்டம்பர் 14 முதல் 20-ம் தேதி வரை சேவை வாரம் கொண்டாடப்படுகிறது. சேவை வார விழாவை முன்னிட்டு ரத்ததா முகாம்கள், மருத்துவ முகாம்கள், நலத்திட்ட உதவிகள் வழங்குதல், கோவில்களில் சிறப்புவழிபாடுகள் போன்றவற்றுக்கு பாஜக நிர்வாகிகள் ஏற்பாடு செய்துள்ளனர்.

மத்திய உள்துறை அமைச்சர் அமி்த்ஷா ட்விட்டரில் பதிவிட்ட வாழ்த்துச் செய்தியில் “நாட்டுக்காகவும், ஏழைகளின் நலனுக்காகவும் அர்ப்பணிப்புடன் சேவைசெய்யும் தேசத்தின் புகழ்பெற்ற தலைவருக்கு பிறந்த நாள் வாழ்த்துகள். மோடியின் வடிவத்தில், தாழ்த்தப்பட்ட மக்களை வளர்ச்சியின் பிரதான நீரோட்டத்துடன் இணைத்து, வலுவான இந்தியாவுக்கு அடித்தளம் அமைத்த ஒருதலைவரை நாடு பெற்றுள்ளது.

நீண்டகாலமாக உரிமைகள் மறுக்கப்பட்ட நிலையில்வாழும் நாட்டின் ஏழை மக்களுக்கு வீடுகள், மின்சாரம், வங்கிக் கணக்கு, கழிவறை, ஏழை தாய்மார்களுக்கு உஜ்வாலாத் திட்டத்தின் கீழ் இலவச சமையல்  கேஸ் இணைப்பு வழங்கப்பட்டன.

மதிப்புக்குரிய வாழ்க்கையை சமூகத்தில் வாழவே இவை வழங்கப்பட்டன.
பிரதமரின் தீர்க்கமான உறுதியும், வலுவான விருப்பமும் காரணமாக மட்டுமே இவையனைத்தும் சாத்தியமாகியுள்ளன.

ஒருவலுவான, பாதுகாப்பான, தற்சார்பு இந்தியாவை உருவாக்க தனது வாழ்க்கையின் ஒவ்வொரு தருணத்தையும் செலவழிக்கும் ஒருசிறந்த தலைவர் நரேந்திர மோடி தலைமையில் பாரதமாதாவுக்கு சேவை செய்வதற்கான வாய்ப்பு கிடைப்பது ஒருபாக்கியம்.

நானும், கோடிக்கணக்கான மக்களுடன் சேர்ந்து, பிரதமர் மோடி நல்ல ஆரோக்கியத்துடனும், நீண்டகாலம் வாழவும் பிரார்த்திக்கிறேன்” எனத் தெரிவித்துள்ளார்.