காரைக்குடியில் பா.ஜ., தேசியசெயலாளர் எச்.ராஜா வீட்டின் மீது நேற்று இரவு, பெட்ரோல் குண்டுடை வீசிவிட்டு மர்ம நபர்கள் தப்பி சென்றனர்.

காரைக்குடி சுப்பிரமணிய புரம் 10-வது வீதியில் எச்.ராஜா வீடு உள்ளது. அவர் சென்னையில் இருப்பதால், அவரது தம்பி பாஸ்கர் குடும்பத்தினர் வசித்துவருகின்றனர். ராஜா, காரைக்குடி வந்தால் கட்சி பணிகளை இந்த வீட்டில் இருந்து கவனிப்பார்.

இங்கு போலீஸ் பாதுகாப்பு போடப்பட்டுள்ளது.நேற்று இரவு 10.30 மணிக்கு, வைரவபுரம் பகுதியில் இருந்து வந்த இருவர் பெட்ரோல்குண்டை வீசி இருசக்கர வாகனத்தில் தப்பிச்சென்றனர். சப்தம்கேட்டு வந்த போலீசார் தீயை அணைத்தனர்.

இது குறித்து டி.எஸ்.பி., முத்தமிழ் விசாரிக்கிறார்.எச்.ராஜாவின் தம்பி மனைவி ஜானகி கூறுகையில், ''இரண்டு நாட்களாக இப்பகுதியில் தெரு விளக்கு எரியவில்லை. வீட்டுக்கு வெளியில் உள்ள மின் விளக்கை அணைத்து விட்டு அப்போதுதான் உள்ளே சென்றேன். திடீரென வெடிக்கும் சப்தம்கேட்டது. போலீசார் தீயை அணைத்து கொண்டிருந்தனர்,'' என்றார்.

சில ஆண்டுகளுக்கு முன் இதேபோல பெட்ரோல்குண்டு வீசப்பட்டது. ஒன்றரை ஆண்டுக்கு முன், கண்டனுாரில் உள்ள எச்.ராஜாவின் தோட்டத்திற்கு அரிவாளுடன் சென்ற நபர்கள், காவலாளியை மிரட்டி சென்றனர் என்பது குறிப்பிடத்தக்கது.

தனது வீட்டில் பெட்ரோல் குண்டு வீசப்பட்டது தொடர்பாக எச்.ராஜா கூறியதாவது; காலைதான் சென்னைக்கு வந்துள்ளேன். நான் அங்கிருப்பதாக அனுமானம் செய்துகொண்டு குண்டு வீசியிருக்கலாம். இதுகுறித்து போலீசாரிடம் புகார் தெரிவித்துள்ளேன். இது முன்னரே திட்டமிட்டதாக்குதல் சம்பவம் என கூறினார்.