கர்நாடகாவில் நடந்து கொண்டிருப்பவை கவலை அளிக்கக்கூடியதாக இருக்கிறது. அங்குள்ள தமிழர்கள் தாக்கப்படுவது வன்மையாகக் கண்டிக்கத்தக்கது.  அதுவும் பேருந்துகளை வெறித்தனமாக எரித்தது அரசியல் அநாகரிகத்தின், அராஜகத்தின் உச்சக்கட்டம். அந்த நிகழ்வுகளை படம் பிடித்த வட இந்திய தொலைக்காட்சிகள் அங்குள்ள காவல் துறையின் இந்நிகழ்வுகளை கண்டிப்பவர்களாகத் தெரியவில்லை.

கண்டும் காணாதவர்களாகவே செயல்பட்டார்கள்  என்று தகவல் தெரிவிக்கின்றன. அதுமட்டுமல்ல இவ்வளவு கலவரங்கள் நடக்கும் போது அங்கு போதிய காவல்துறையினர் இல்லை என்பதும் அவர்கள் அதிகார பூர்வமாக கொடுக்கும் தகவலாகவோ இருக்கிறது.  அதனால் கர்நாடக முதலமைச்சர் சித்தராமய்யா செயல்படாமல் வேண்டுமென்றே இருந்து விட்டு மற்றவர்கள் வெறியோடு செயல்பட வேண்டுமென்றே இருப்பதைப் போலவே தான் ஓர் சூழ்நிலை அங்கு இருக்கிறது.

    இன்று மத்திய உள்துறை அமைச்சர் மரியாதைக்குரிய திரு. ராஜ்நாத் சிங் தலையிட்டு அமைதியை ஏற்படுத்த வேண்டும் என்று கண்டிப்புடன் அறிவித்த பின்பு தான் இன்று அங்கு ஓரளவு நடவடிக்கையாவது எடுக்கப்பட்டு வருகிறது.  அதுமட்டுமல்ல இல்லாத பிரச்சினைக்கு பாதயாத்திரை செய்து கொண்டிருக்கும் ராகுல்காந்தியும், காஷ்மீர் பிரச்சனையைப் பற்றி பேசிக் கொண்டிருக்கும் காங்கிரஸ் தலைவர்களும் பெங்களுர் எரிந்து கொண்டிருப்பதைக் கண்டும் காணாமல் இருப்பது தமிழர்களின் உணர்வுகளையும், உயிர்களையும் பலி கொடுத்து கர்நாடகாவில் குளிர்காய வேண்டும் என காங்கிரஸ் நினைக்கிறது என்பதை அப்பட்டமாக வெளிப்படுத்துகிறது. 

அங்குள்ள கலவரங்களை  அடக்க முடியாத சித்தராமய்யா உடனே பதவி விலக வேண்டும்.  மத்திய அரசு தலையிட்ட பின்பு தான் அங்கு கொஞ்சமாவது அமைதி திரும்பியிருக்கிறது.  அதுமட்டுமல்ல இது ஓணம் பண்டிகைக்காலம், பெங்களுரில் இருந்து கேரளாவிற்கு செல்ல மக்கள் தவித்துக் கொண்டிருக்கிறார்கள்.  தாக்குதலுக்குள்ளான தமிழர்கள் சாரை சாரையாக தமிழகத்திற்கு நடந்தே வந்துக்கொண்டிருக்கிறார்கள்.  தேசிய ஒருமைப்பாட்டிற்கே காங்கிரஸ் தீ வைத்துக் கொண்டிருக்கிறது.  அது மட்டுமல்ல இதனால் பாரதிய ஜனதா கட்சியின் மீது அநாவசியமாக குற்றச்சாட்டுகள் சுமத்தப்பட்டிருக்கிறது.  

அங்குள்ள சூழ்நிலையைப் பயன்படுத்தி அரசியல் செய்ய வேண்டிய நிலை பாரதிய ஜனதா கட்சிக்கு இல்லை.  மரியாதைக்குரிய திரு. வெங்கையா நாயுடு,  திரு. ராஜ்நாத்சிங் போன்றவர்கள் அங்கு நடக்கும் தமிழர்கள் மீதான தாக்குதலைக் கடுமையாகக் கண்டித்திருக்கிறார்கள்.  நம் பிரதமர் திரு. மோடி  அவர்கள் கர்நாடகாவில் நடக்கும் தமிழர்கள் மீதான தாக்குதலுக்கு மன வேதனை தெரிவித்திருக்கிறார்.  கர்நாடகாவில் காங்கிரஸ் அரசியல் செய்வதை விட்டு உடனே அமைதி திரும்ப வழி செய்ய வேண்டும்.  அதுமட்டுமல்ல தமிழர்களை தூண்டிவிடும் தேசவிரோத சக்திகளின் சூழ்ச்சிக்கு தமிழர்கள் பலியாகக் கூடாது என்பதையும் நாம் புரிந்து கொள்ள வேண்டும்.

ஓரளவு நமக்கு கிடைக்க வேண்டிய நியாயம் கிடைத்துக் கொண்டிருக்கும் வேளையில் வன்முறை எந்தவிதத்திலும் அதைக் கெடுத்து விடக்கூடாது என்றும் வன்முறை எந்த பிரச்சினைக்கும் தீர்வாகாது என்பதையும் அனைவரும் தெளிவாகப் புரிந்து நாள்தோறும் பெங்களுரின் முன்னேற்றத்திற்கு தமிழகர்களின் பங்கு அளவிட முடியாதது என்பதையும் சித்தராமய்யா உணர வேண்டும்.  அவர்களை அடிப்பதும் எரிக்க முயற்சிப்பதும் பெங்களுரின் முன்னேற்றத்தையே அழிப்பதாகும்.  சித்தராமய்யா உடனே இந்தக் கலவரங்களைக் கட்டுப்படுத்தவில்லையென்றால் வருங்காலத்தில் இந்த சூழ்நிலை பதவி இறங்கவோ, இழக்கவோ தான் உதவும் என்பதை தெரிவித்துக்கொள்கிறேன்.

Dr. தமிழிசை சௌந்தரராஜன்  
மாநில  தலைவர்

Leave a Reply