அரியலூர் மாவட்டம் ஜெயங்கொண்டம் அருகே உள்ள தா.பழூரில் பிஜேபி சார்பில் மத்திய அரசு கொண்டுவந்துள்ள வேளாண் சட்டங்கள் குறித்த விவசாயிகளுடனான கலந்துரையாடல் நிகழ்ச்சி நடைபெற்றது. இதில் பிஜேபி யின் மாநில தலைவர் எல்.முருகன் கலந்துகொண்டதுடன் வேளாண் சட்டங்களால் ஏற்படும் நன்மைகள் குறித்து விவசாயிகளிடம் எடுத்து விளக்கி கூறி பேசினார்.

பின்னர் முருகன் செய்தியாளர்களை சந்தித்துகூறியதாவது, “புதிய வேளாண் சட்டங்களால் விவசாயிகள் வணிகர்களாக மாறும் சூழ்நிலை ஏற்பட்டுள்ளது. புதியதொழில்நுட்பம் இரட்டிப்பு மகசூல் போன்ற நன்மைகள் இந்தசட்டங்களால் விவசாயிகளுக்கு கிடைக்கும். இதனால் பி.ஜே.பிக்கு விவசாயிகள் மத்தியில் நற்பெயர் ஏற்பட்டிருக்கிறது. இந்த நல்லபெயரை கெடுக்க வேண்டும் என்ற நோக்கத்திலேயே திமுக போராட்டங்களை முன்னெடுத்து நடத்தி வருகிறது. எல்லாமே அரசியலுக்காக செய்யப்படுகிறது. இது கண்டிக்கத்தக்கது.

வரும் சட்டமன்றதேர்தலில் தற்போதுள்ள கூட்டணி தொடரும். ஆனால் யார் தலைமையில் தேர்தலை சந்திப்பது? யார் முதலமைச்சர் வேட்பாளர் என்பதை பிஜேபி யின் தேசியதலைமைதான் முடிவுசெய்யும். அதிமுகவில் முதல்வர் வேட்பாளராக எடப்பாடி பழனிசாமி அறிவிக்கப்பட்டுள்ளார். இதற்காக நானும் அவரைசந்தித்து எனது வாழ்த்துகளை தெரிவித்தேன். ஆனால் யார் தலைமையில் தேர்தலை சந்திப்பது, முதல்வர் வேட்பாளர் யார் என்பதை கூடியவிரைவில் பி.ஜே.பியின் தேசியதலைமை முடிவு செய்து விரைவில் அறிவிக்கும்.

எனது தலைமையிலான வேல்யாத்திரையை தமிழக அரசு தடுத்தது என்பது கேள்வியாக இருக்கிறது. ஆனால் வேல்யாத்திரை மூலம் எங்களுக்கு மிகப்பெரிய எழுச்சி ஏற்பட்டுள்ளது. வேல்யாத்திரை மூலம் சட்டமன்ற தேர்தல் பிரசாரத்தை தொடங்கிய நாங்கள் இதுவரை 20 மாவட்டங்களில் தேர்தல்பரப்புரையை முடித்து விட்டோம். விவசாயிகளை சந்தித்து 1,000 கலந்துரையாடல் கூட்டங்களை நடத்தியிருக்கிறோம். மத்திய அரசு நல்லது செய்தாலும் அதை எதிர்க்கவேண்டும் என்பதே கமல்ஹாசனின் எண்ணம்” என தெரிவித்தார்.

Comments are closed.