நாட்டில் வேலைவாய்ப்பை அதிகரிக்க மத்திய அரசு அனைத்துத் தளங்களிலும் தீவிரமாகப் பணியாற்றி வருவதாகப் பிரதமர் நரேந்திர மோடி சனிக்கிழமை தெரிவித்தார். இதற்காக தடையற்ற வர்த்தக ஒப்பந்தங்கள் (FTAs), திறன் மேம்பாட்டுத் திட்டங்கள் மற்றும் 2 கோடி இளைஞர்களை முறையான பணிச்சூழலுக்குள் கொண்டுவரும் நோக்கில் செயல்படுத்தப்படும் ₹21 லட்சம் கோடி மதிப்பிலான வேலைவாய்ப்பு ஊக்கத்தொகை திட்டம் ஆகியவற்றை அவர் சுட்டிக்காட்டினார்.

பல்வேறு அரசுத் துறைகள் மற்றும் நிறுவனங்களில் பணியாற்றுவதற்காக 51,000-க்கும் மேற்பட்டோருக்குப் பணி நியமனக் கடிதங்கள் வழங்கப்பட்ட 20-வது ரோஸ்கார் மேளாவில் காணொலிக் காட்சி வாயிலாக உரையாற்றிய பிரதமர், 2047-க்குள் ‘வளர்ந்த இந்தியா’வை உருவாக்கும் மாபெரும் இலக்கை நோக்கி நாடு முன்னேறி வருவதாகக் கூறினார்.

அப்போது அவர் பேசியதாவது:

“இந்த இலக்கை அடைவதில் உங்களைப் போன்ற இளைஞர்களுக்கு மிக முக்கியப் பங்கு உள்ளது. அரசுப் பணியில் இருக்கும்போது, வளர்ந்த மற்றும் தன்னிறைவு பெற்ற இந்தியாவை நோக்கிய இயக்கத்தை வலுப்படுத்தும் வகையிலேயே உங்களின் ஒவ்வொரு முடிவும் இருக்க வேண்டும். இளைஞர்களாகிய உங்களுக்கு, குறிப்பாக மற்ற இளைஞர்கள் மீது தனிப் பொறுப்பு உள்ளது.

நமது கண்டுபிடிப்பாளர்கள், தொழில்முனைவோர் மற்றும் நமது இளைய தலைமுறையின் ஆற்றல் மீது உலகமே பெரும் நம்பிக்கை வைத்துள்ளது.”

கடந்த சில ஆண்டுகளில் மேற்கொள்ளப்பட்ட பொருளாதார ரீதியான தூதரக முன்னெடுப்புகளைக் குறிப்பிட்ட பிரதமர், “இந்தியா இதுவரை 40 தடையற்ற வர்த்தக ஒப்பந்தங்களில் கையெழுத்திட்டுள்ளது. இந்த ஒப்பந்தங்கள் நமது இளைஞர்களுக்கு புதிய வாய்ப்புக் கதவுகளைத் திறந்து விடுகின்றன. நமது தொழில்முனைவோருக்குப் புதிய கூட்டாண்மைகளுக்கும், புதிய சந்தைகளுக்கும் வழிவகுப்பதுடன், இளைஞர்களின் எதிர்கால வளர்ச்சிக்குப் புதிய பாதைகளையும் உருவாக்குகின்றன” என்றார்.

சமீபத்தில் நிறைவடைந்த பிரிக்ஸ் உச்சி மாநாட்டைக் குறிப்பிட்ட அவர், பிரிக்ஸ் நாடுகளின் ஒத்துழைப்பு வெறும் அரசுகளோடு மட்டும் நின்றுவிடாமல் இருப்பதை உறுதிசெய்ய இந்தியா முயற்சித்து வருகிறது என்றார். “நமது தொழில்முனைவோர், விவசாயிகள், பெண்கள் மற்றும் இளைஞர்கள் என அனைவரும் இந்தக் கூட்டாண்மையில் தீவிரப் பங்காளிகளாக மாற வேண்டும்” என்றும் அவர் வலியுறுத்தினார்.

தேசியக் கல்விக் கொள்கை, ஸ்கில் இந்தியா திட்டம், பிரதான் மந்திரி கௌஷல் விகாஸ் யோஜனா உள்ளிட்ட அரசின் பல்வேறு திறன் மேம்பாட்டுத் திட்டங்களை விவரித்த பிரதமர், பி.எம்-சேது (PM-SETU) திட்டத்தின் கீழ் ₹60,000 கோடி முதலீடு மற்றும் தொழில் நிறுவனங்களின் பங்களிப்புடன் 1,000 அரசு தொழில் பயிற்சி நிலையங்கள் (ITI) நவீனமயமாக்கப்பட்டு வருவதாகத் தெரிவித்தார். “மாறிவரும் பொருளாதாரத்தின் தேவைகளுக்கு ஏற்ப இளைஞர்களின் கல்வியும் திறனும் ஈடுகொடுப்பதை உறுதி செய்வதே நமது நோக்கம்” என்றார்.

நாட்டின் ஸ்டார்ட்-அப் சூழல் குறித்துப் பேசிய அவர், இந்தியா தற்போது உலகின் மூன்றாவது பெரிய ஸ்டார்ட்-அப் கட்டமைப்பாக உருவெடுத்துள்ளது என்று குறிப்பிட்டார். “இன்று கிராமங்கள், சிறு நகரங்களைச் சேர்ந்த இளைஞர்களும் கூட இந்தியாவின் புதிய பொருளாதாரத்தில் முக்கியப் பங்காற்றி வருகின்றனர்” என்றார்.

முதல்முறை பணிக்குச் சேரும் ஊழியர்களுக்கு ₹15,000 வரை ஊக்கத்தொகை வழங்குவதோடு, புதிய வேலைவாய்ப்புகளை உருவாக்கும் நிறுவனங்களுக்கும் நிதி ஊக்கத்தொகை வழங்கும் ₹21 லட்சம் கோடி மதிப்பிலான ‘பிரதான் மந்திரி விக்சித் பாரத் ரோஸ்கார் யோஜனா’ திட்டத்தையும் பிரதமர் எடுத்துரைத்தார்.

மேலும், அரசு ஊழியர்களின் திறனை மேம்படுத்த உதவும் ‘கர்மயோகி’ இணையதளத் தளத்தில் 1.7 கோடிக்கும் அதிகமான அரசு ஊழியர்கள் இணைந்துள்ளதாகவும் அவர் தெரிவித்தார்.

ரோஸ்கார் மேளா திட்டத்தின் கீழ் சனிக்கிழமையன்று நாடு முழுவதும் மொத்தம் 45 இடங்களில் வேலைவாய்ப்பு முகாம்கள் நடைபெற்றன. இதன் மூலம் இத்திட்டத்தின் கீழ் இதுவரை வழங்கப்பட்ட பணி நியமனக் கடிதங்களின் மொத்த எண்ணிக்கை 12.75 லட்சத்தை எட்டியுள்ளதாக அரசுத் தரப்பில் தெரிவிக்கப்பட்டுள்ளது.