பாஜக பிரதமர் பதவிவேட்பாளர் நரேந்திர மோடியை ஆதரித்து, தொடர்ந்து 50 நாள்கள் பிரசாரம் மேற்கொள்ளத் திட்டமிட்டுள்ள பிகார் பா.ஜ.க, 250 ரதங்களைப் பயன் படுத்தவும், 1,000 பேரணிகளை நடத்தவும் முடிவு செய்துள்ளது.

இது குறித்து மாநில பா.ஜ.க தலைவர் மங்கள்பாண்டே செய்தியாளர்களிடம் கூறியதாவது: பிகார் மாநிலத்தில் உள்ள 40 மக்களவை தொகுதிகளுக்கான பிரசாரம் வெள்ளிக் கிழமை தொடங்கியுள்ளது. ஒவ்வொரு ரதமும், சிறந்த கலைநயத்துடன் வடிவமைக்கப்பட்டு, எல்.இ.டி தொலைக் காட்சி பொருத்தப்பட்டு பிரசாரம் மேற்கொள்ளப்படுகிறது.

சட்டப்பேரவைத் தொகுதிவாரியாக இப்பிரசாரம் மேற்கொள்ளப்பட உள்ளது. பிரசாரத்தின் போது, தேநீர் விற்பனை செய்தது உள்பட மோடியின் ஏழ்மையான பின்னணி, அவரதுகோஷங்கள், சொற்பொழிவுகள், கடந்த ஆண்டு பிகார் காந்திமைதானத்தில் நடைபெற்ற பொதுக்கூட்ட உரை போன்றவை இடம்பெறும். ஒவ்வொரு ரதமும், ஒரு சட்டப்பேரவை தொகுதியில் உள்ள நான்கு முதல் ஐந்து இடங்களில் தினசரி பிரசாரம் மேற்கொள்ளும். தவிர, 25 லட்சம் ஸ்டிக்கர்கள், ஒருகோடி துண்டுப் பிரசுரங்கள் மக்களுக்கு விநியோகிக்கப்பட உள்ளன என்றார்.