மஹாராஷ்டிராவில் உள்ள பீமாகோரேகான் விவகாரத்தில் நடத்தப்பட்ட அதிரடி சோதனைகளில் மாவோயிஸ சிந்தனை எழுத்தாளர் வராவரராவ், பத்திரிகையாளர் குர்மநாத் கிராந்தி, புகைப்படக் கலைஞர் கிராந்தி, வழக்கறிஞர் சுதா பரத்வராஜ் மற்றும் செய்தியாளர் ஒருவர் உட்பட 5 பேர் செவ்வாய் கிழமை கைது செய்யப்பட்டுள்ளனர். 

மேலும், முன்னாள் பிரதமர் ராஜீவை கொன்றது போன்று பிரதமர் மோடியையும் கொல்ல சதிதிட்டம் தீட்டப்பட்டது அம்பலமானது. இது தொடர்பான சோதனைகளில் லேப்-டாப் உள்ளிட்ட முக்கிய ஆவணங்கள் பறிமுதல் செய்யப்பட்டுள்ளன. இதில் இருந்த தகவல்களின் அடிப்படையில் இவர்கள் பிரதமர் மோடியை கொல்ல சதித் திட்டம் தீட்டியது அம்பலமானது.

மாவோயிஸ சிந்தனை எழுத்தாளர் வராவர ராவ், பத்திரிகையாளர் குர்மநாத் கிராந்தி ஆகியோருக்கு தடை செய்யப்பட்டுள்ள மாவோயிஸ்ட்களுடன் தொடர்பு இருப்பதும் தெரியவந்துள்ளது. 

இதுகுறித்து காங்கிரஸ் தலைவர் ராகுல், தனது ட்விட்டர் பக்கத்தில் பதிவிட்டதாவது:

இந்தியாவிலேயே ஆர்எஸ்எஸ் அமைப்புக்கு மட்டும்தான் அனுமதி உள்ளது. இதர அனைத்து அமைப்புகளையும் மூடவேண்டியது தான். அந்த அமைப்புகளின் போராளிகளை கைதுசெய்ய வேண்டியதுதான். புதிய இந்தியாவுக்கு வரவேற்கிறேன் என்று விமர்சித்திருந்தார்.

இதற்கு மத்திய அமைச்சர் கிரண் ரிஜுஜு தனது ட்விட்டர் பக்கத்தில் பதிலடி அளித்துள்ளார். அதில், உள்நாட்டுப் பாதுகாப்புக்கு மாவோயிஸ்டுகளால் தான் மிகப் பெரிய அச்சுறுத்தல் இருப்பதாக முன்னாள் பிரதமர் மன்மோகன் சிங் கூறியுள்ளார்.

ஆனால் தற்போது காங்கிரஸ் தலைவர் ராகுல், மாவோயிஸ்டு அமைப்புக்கு வெளிப்படையாக ஆதரவுதெரிவிக்கிறார். அவர்களுக்காக அனுதாபப் படுகிறார். தேசநலன் அரசியலுக்கு அப்பாற்பட்டு இருக்க வேண்டும் என்று பதிவிட்டுள்ளார்.