வெளியீட்டு விழாவில் தமிழ்நாடு பா.ஜ.க., தலைவர் அண்ணாமலை பேசியதாவது:

கடந்த ஆண்டு ஜூலை மாதம் 28-ம் தேதி அன்று, புண்ணிய பூமியான ராமேஸ்வரம் மண்ணில் தொடங்கிய, தமிழக பாஜகவின் என் மண் என் மக்கள் நடைப்பயணத்தில், தமிழகத்தின் 234 சட்டமன்றத் தொகுதிகளிலும், பொதுமக்களோடு பயணித்த ஒவ்வொரு அனுபவத்தையும், தினந்தோறும் பதிவு செய்யும் வாய்ப்பினை தினமலர் நாளிதழ் வழங்கியிருந்தது. தற்போது, நாளிதழில் வெளியான நமது பயண அனுபவங்களைத் தொகுத்து, ‘உங்களில் ஒருவன்’ என்ற புத்தகமாக வெளியிட்டிருப்பது பெரும் மகிழ்ச்சி அளிக்கிறது.

இன்று காலை, தினமலர் நாளிதழ் வெளியீட்டாளர் ( கோவை) திரு.ஆதிமூலம், தினமலர் நாளிதழ் இணை ஆசிரியர் திரு.இரா.கிருஷ்ணமூர்த்தி ஆகியோர் முன்னிலையில்,தினமலர் நாளிதழ் வெளியீட்டாளர் (மதுரை) மரியாதைக்குரிய திரு. Dr. L.ராமசுப்பு அவர்களிடம், ‘உங்களில் ஒருவன்’ புத்தகத்தைப் பெற்றுக் கொண்டதில் பெருமையடைகிறேன்.

பெரும் பாரம்பரியமிக்க, தேசியச் சிந்தனை மிக்க தினமலர் நாளிதழ், குமரி மாவட்டத்தை தமிழகத்துடன் இணைப்பதற்கான போராட்டங்களில் முக்கியப் பங்கு வகித்ததோடு, பொதுமக்கள் நலனுக்காக எப்போதுமே குரல் கொடுத்து வரும் பெருமைக்குரியது. அரசுகள் தவறிழைக்கும் போது, ஆக்கப்பூர்வமான விமர்சனங்களை முன்வைத்து, ஜனநாயகத்தின், வலிமையான நான்காவது தூண் என்ற பத்திரிகை தர்மத்தினையும் கடைப்பிடித்து வரும் சிறப்புக்குரியது.

கடந்த 73 ஆண்டுகளாக, சீரிய முறையில் செயலாற்றி வரும் தினமலர் நாளிதழில், என் மண் என் மக்கள் பயண அனுபவங்களை, பகிர்ந்து கொள்ளும் வாய்ப்பினை வழங்கியதற்கும், அவற்றை, ‘உங்களில் ஒருவன்’ என்ற புத்தகமாக வெளியிட்டிருப்பதற்கும், நாளிதழ் நிர்வாகத்திற்கு மனமார்ந்த நன்றிகளைத் தெரிவித்துக் கொள்கிறேன். இவ்வாறு அண்ணாமலை பேசினார்.