லோக்பால் மசோதா விவகாரத்தில், பார்லிமென்டை மத்திய அரசு திசை திருப்பிவிட்டது. எனவே, இந்த மசோதா நிறைவேற நீங்கள் தலையிட வேண்டும்; பார்லிமென்ட் சிறப்புக் கூட்டத்தை கூட்ட வேண்டும் என, ஜனாதிபதி பிரதிபா பாட்டீலிடம் பா.ஜ., தலைவர்கள் வேண்டுகோள் விடுத்தனர். பா.ஜ., மூத்த தலைவர் அத்வானி தலைமையில், அந்தக் கட்சியின் தலைவர்கள் நேற்று, ஜனாதிபதி பிரதிபா பாட்டீலை சந்தித்துப் பேசினர். அப்போது, பார்லிமென்டின் சிறப்புக் கூட்டத்தொடரை கூட்ட வேண்டி, மனு ஒன்றையும் அளித்தனர்.

சந்திப்புக்குப் பின், நிருபர்களிடம் பேசிய, ராஜ்யசபா எதிர்க்கட்சித் தலைவர் அருண் ஜெட்லி கூறியதாவது: சர்ச்சைக்குரிய லோக்பால் மசோதா விவகாரத்தில், ராஜ்யசபாவில் ஓட்டெடுப்பு நடக்காத வகையில், இந்திய பார்லிமென்டரி அமைப்பையே, மத்திய அரசு முழுமையாக திசை திருப்பிவிட்டது. அதனால், பார்லிமென்ட் கூட்டத்தொடரை மீண்டும் கூட்டும்படி, மத்திய அரசுக்கு ஆலோசனை சொல்ல வேண்டும் என, ஜனாதிபதியை கேட்டுக் கொண்டோம். ராஜ்யசபாவில் மீண்டும் ஓட்டெடுப்பு நடக்கச் செய்ய வேண்டும் என, வலியுறுத்தினோம். கடந்த டிசம்பர் 29ம் தேதி இரவு, ராஜ்யசபாவில் நடந்த நிகழ்ச்சிகளை ஜனாதிபதியிடம் விவரித்த நாங்கள், எங்களின் அதிருப்தியை தெரிவித்ததோடு, ஜனாதிபதி இந்தப் பிரச்னையில் தலையிட வேண்டும் என்றும் கேட்டுக் கொண்டோம். எங்களின் புகாரைக் கேட்ட ஜனாதிபதி, அனைத்து அம்சங்களையும் ஆலோசித்து முடிவெடுப்பதாக தெரிவித்துள்ளார்.

லோக்பால் மசோதாவில், எதிர்க்கட்சியினர் பல திருத்தங்களைக் கொண்டு வந்தனர். அவையெல்லாம், லோக்பாலுக்கு தனி புலனாய்வு நிறுவனம் தேவை, லோக்பால் அமைப்பிற்கான உறுப்பினர்களை தேர்வு செய்வதில், அரசின் தலையீடு இருக்கக் கூடாது என்ற பொதுவான திருத்தங்களே. இவ்வாறு அருண் ஜெட்லி கூறினார்.