ஆசிய நாடான மாலத்தீவு, இந்திய பெருங்கடல் பகுதியில் முக்கியமான இடத்தில் அமைந்துள்ளது. சுற்றுலாவுக்கு மிகவும் பிரபலம். கடந்தாண்டு நவம்பரில் நடந்த அதிபர் தேர்தலில், முகமது முய்சு வெற்றி பெற்றார்.

தீவிர சீன ஆதரவாளரான இவர், துவக்கத்திலேயே இந்தியாவுக்கு எதிராக கருத்து தெரிவித்தார். இந்தியாவை வெளியேற்றுவோம் என்று கூறியே தேர்தலை சந்தித்தார்.

அதிபரான பின், தங்கள் நாட்டில் உள்ள இந்திய படைகளை விலக்கிக் கொள்ளும்படி அவர் உத்தரவிட்டார். இதையடுத்து, அங்கு பாதுகாப்பு மற்றும் மனிதநேய உதவிக்காக நிறுத்தப்பட்ட நம் வீரர்கள் திரும்பப் பெறப்பட்டனர்.

இதற்கிடையே, சுற்றுலா தொடர்பாக, நம் நாட்டையும், பிரதமர் மோடியையும் அந்த நாட்டின் அமைச்சர்கள் கடுமையாக விமர்சித்தனர்.

இதனால், இரு நாட்டுக்கும் இடையேயான உறவில் கசப்பு ஏற்பட்டது. சீனாவுக்கு ஆதரவாக அவர் செயல்பட்டு வந்தார்.

தற்போது மாலத்தீவு கடுமையான பொருளாதார நெருக்கடியில் சிக்கியுள்ளது. முக்கியமாக வருவாயை ஈட்டி தந்த சுற்றுலா பெரும் பாதிப்பை சந்தித்தது. இதனால், முகமது முய்சு நிலைப்பாட்டில் மனமாற்றம் ஏற்பட்டது.

கடந்தாண்டு இறுதியில் நம் வெளியுறவு அமைச்சர் ஜெய்சங்கர் நேரில் சென்று, இந்தியா வரும்படி அவருக்கு அழைப்பு விடுத்திருந்தார். அதன்படி, ஐந்து நாள் அரசு முறை பயணமாக முகமது முய்சு இந்தியா வந்துள்ளார்.

ஜனாதிபதி மாளிகையில் அவருக்கு நேற்று சிறப்பான வரவேற்பு அளிக்கப்பட்டது. இதைத் தொடர்ந்து, பிரதமர் நரேந்திர மோடியுடன் இரு தரப்பு உறவுகள் குறித்து அவர் ஆலோசனை நடத்தினார்.

இந்த சந்திப்பின்போது, இரு தரப்பு உறவுகளை மீண்டும் மேம்படுத்துவது தொடர்பாக பல முக்கிய முடிவுகள் எடுக்கப்பட்டன.