‘பாரதிய நியாய சன்ஹிதா, பாரதிய நாகரிக் சுரக் ஷா சன்ஹிதா, பாரதிய சாக் ஷ்ய அபினியம்’ ஆகிய இந்த மூன்று புதிய கிரிமினல் சட்டங்கள், ஜூலை 1 முதல் அமலுக்கு வந்துள்ளன. இந்த மூன்று சட்டங்களையும் முழுமையாக நடைமுறைபடுத்தியுள்ளது, சண்டிகர் யூனியன் பிரதேசம்.

இதன் வாயிலாக மூன்று சட்டங்களையும் முழுமையாக செயல்படுத்தியுள்ள முதல் நிர்வாக பிரிவாக சண்டிகர் விளங்குகிறது. இது தொடர்பாக நேற்று நடந்த விழாவில் பிரதமர் மோடி, மத்திய உள்துறை அமைச்சர் அமித் ஷா உள்ளிட்டோர் பங்கேற்றனர்.

இதைத் தொடர்ந்து பிரதமர் மோடி பேசியதாவது:

நம் நாட்டை ஆக்கிரமித்து ஆட்சி புரிந்து வந்த பிரிட்டிஷ் அரசுக்கு, 1857ல் நடந்த சிப்பாய் கலகம் பெரும் கலக்கத்தை அளித்தது. அதையடுத்து, இந்திய மக்களை அடிமைகளாக வைத்திருப்பதற்காக கொண்டு வரப்பட்டவையே இந்த சட்டங்கள். இதன்படி, 1860ல் இந்திய தண்டனை சட்டம் வந்தது. அதைத் தொடர்ந்து மற்ற சட்டங்கள் வந்தன. இந்த சட்டங்களின் நோக்கம், இந்திய மக்களுக்கு எதிராக அட்டூழியங்கள் செய்வது, சுரண்டுவதே.