மகாகவி சுப்ரமணிய பாரதியாரின் 143வது பிறந்த நாள் நேற்று நாடு முழுதும் கொண்டாடப்பட்டது.
இதையொட்டி, மத்திய கலாசாரத் துறையின் கீழ் செயல்படும் சாகித்ய அகாடமி சார்பில், பாரதியார் படைப்புகளின் தொகுப்பு வெளியிடப்பட்டது.

டில்லியில் உள்ள பிரதமரின் இல்லத்தில் நடந்த நிகழ்ச்சியில், எழுத்தாளர் சீனி விஸ்வநாதன் தொகுத்துள்ள ‘கால வரிசையில் பாரதி படைப்புகள்’ என்ற நுாலை, பிரதமர் நரேந்திர மோடி நேற்று வெளியிட்டார். தமிழகத்தின் 123 ஆண்டுகள் பழமையான, ‘அல்லயன்ஸ்’ நிறுவனம் வெளியிட்டுள்ள இந்த நுாலில், பாரதியின் எழுத்துக்களின் பதிப்புகள், விளக்கங்கள், ஆவணங்கள், பின்னணி தகவல்கள் மற்றும் தத்துவ விளக்கக் காட்சி போன்றவை இடம்பெற்றுள்ளன.

பாரதியின் படைப்பு தொகுப்பை வெளியிட்டு மோடி பேசியதாவது: மாபெரும் கவிஞர் சுப்ரமணிய பாரதியின் பிறந்த நாளை நாடு கொண்டாடுகிறது. நான் அவரை பக்தியுடன் வணங்குகிறேன். அவரது மரபுக்கு என் இதயப்பூர்வமான அஞ்சலியை செலுத்துகிறேன். மகாகவி சுப்ரமணிய பாரதியின் படைப்புகளை வெளியிடுவதில் பெருமிதம் கொள்கிறேன்.

நாட்டின் தேவைகளை மனதில் வைத்து பாடுபட்ட சிறந்த சிந்தனையாளர் சுப்ரமணிய பாரதி. அவருடைய பார்வை மிகவும் விசாலமானது. அந்த காலக்கட்டத்தில் நாட்டிற்கு தேவையான அனைத்து திசைகளிலும் பாரதி பணியாற்றினார்.