பாஜக கூட்டணியில் தே.மு.தி.க, பா.ம.க, ம.தி.மு.க உள்ளிட்ட கட்சிகள் சேர்வது உறுதியாகிவிட்டது. இந்த கட்சிகளுடன் வரும் 21ம்தேதி முதல் தொகுதிப்பங்கீடு பேச்சுவார்த்தை தொடங்கும்' என காந்திய மக்கள் இயக்க ஒருங்கிணைப்பாளர் தமிழருவிமணியன் கூறியுள்ளார்.

இது குறித்து அவர் செய்தியாளர்களிடம் தெரிவித்ததாவது; பாஜக அணியில் தேமுதிக, பாமக, மதிமுக, கொங்குவேளாளர் மக்கள் கட்சி, இந்திய ஜனநாயகக் கட்சி உள்ளிட்ட கட்சிகள் வருவது உறுதி. பாஜக அகில இந்திய செயற்குழு கூட்டம் முடிந்ததும் தமிழக பா.ஜ.க முக்கிய தலைவர்களும், முக்கிய தேசிய தலைவர்களும் 20-ம்தேதி தமிழகம் வருகின்றனர்.

கூட்டணி கட்சிகளுடனான அதிகாரப் பூர்வ பேச்சு வார்த்தையை 21-ம்தேதி முதல் தொடங்க உள்ளனர். இம்மாத இறுதிக்குள் தொகுதிப்பங்கீடு இறுதியாகி விடும். தேமுதிக, பாமக, மதிமுக உள்ளிட்ட அனைத்து கட்சித் தலைவர்களும், ஏற்கெனவே தங்களுக்கான தொகுதிகள்குறித்து முடிவு செய்து விட்டனர்.

பிப்ரவரி 8-ம்தேதி பாஜக பிரதமர் வேட்பாளர் நரேந்திரமோடி தமிழகம் வருகிறார். அவர் பங்கேற்கும் கூட்டத்தில், கூட்டணிக் கட்சி தலைவர்கள் பங்கேற்று, தேர்தல்பிரச்சாரத்தை தொடங்க உள்ளனர்.

தமிழகத்தில் திமுக, அதிமுக உள்ளிட்ட கட்சிகளின் ஆதிக்கத்தை மாற்றும்வகையில் இந்த கூட்டணிக்கான முயற்சிகளை மேற்கொண்டுள்ளேன். தி.மு.க தலைவர் கருணாநிதி ஆயிரம்முயற்சிகள் மேற்கொண்டாலும், பாஜக தலைமையில் வலுவான கூட்டணி அமைவதை தடுக்கமுடியாது என்றார்.