பிரதமர் மோடி இலங்கை சுற்று பயணத்தை முடித்துக் கொண்டு நாடுதிரும்பி உள்ளார். அவரது சுற்றுப்பயணம் குறித்து மத்திய அமைச்சர் பொன்.ராதாகிருஷ்ணன் கூறியதாவது:–

இந்திய பிரதமர் ஒருவர் 27 ஆண்டுகளுக்கு பிறகு இலங்கைசென்றது மட்டுமல்ல தமிழர்பகுதிக்கு சென்ற முதல் இந்திய பிரதமர் என்ற சாதனையையும் மோடி ஏற்படுத்தியுள்ளார்.

இலங்கை பாராளுமன்றத்தில் அந்நாட்டு அதிபர், பிரதமர், பாராளுமன்ற உறுப்பினர்கள் முன்னிலையில் உரையாற்றிய பிரதமர் மோதி இலங்கை தமிழர்களுக்கு சம உரிமை, சம அந்தஸ்து வழங்கப்படவேண்டும் என வலியுறுத்தியுள்ளார். உரிமை என்பது சட்டத்தால் கிடைப்பது. அந்தஸ்து என்பது மனதளவில் கிடைப்பது.

தமிழர்கள் பகுதிக்குசென்ற மோடி தமிழர்கள் இந்தியாவை நம்பலாம் என்ற வாக்குறுதியையும் அளித்துள்ளார். இந்திய நிதியில் கட்டப்பட்ட 27 ஆயிரம் வீடுகளை தமிழர்ளுக்கு ஒப்படைத்துள்ளார். மேலும் 47 ஆயிரம் வீடுகள் கட்டித் தரப்படும் என்று அறிவித்துள்ளார். வடக்கு மாகாணத்துக்கு நிலஉரிமையும், காவல்துறை அதிகாரமும் வரும் என்பதற்கு முன்னறிவிப்பாக அமைந்துள்ளது.

இலங்கை தமிழர்களுக்கு துரோகம்செய்த முன்னாள் அதிபர் ராஜபக்சேவை தண்டிக்க பலவழிகள் உள்ளன. அவர் இன்றுதான் தண்டிக்கப்பட்டதாக உணர்கிறார். தனது தோல்விக்கு இந்தியாதான் காரணம் என்று கூறுகிறார்.

இலங்கை தமிழர்கள் பெயரைசொல்லி அரசியல் நடத்துபவர்கள், கூக்குரலிட கூடியவர்கள் ராஜபக்சேவின் அறிக்கையையும், வடக்கு மாகாண முதல்வர் விக்னேஸ்வரனின் அறிக்கையையும் படித்துதெளிவது அவசியம்.

இலங்கை தமிழர்களுக்கு பிரதமர் மோடி புதிய நம்பிக்கையை கொடுத்துள்ளார். புதிய பார்வையோடு புதிய துவக்கத்தை ஏற்படுத்தி உள்ளார். நிச்சயமாக இது இலங்கை தமிழர்கள் வாழ்வில் ஒரு திருப்புமுனையை ஏற்படுத்தும்.

இவ்வாறு அவர் கூறினார்.