சிட்டி யூனியன் வங்கியின் 116-வது ஆண்டுவிழா சென்னையில் இன்று நடைபெற்றது. இதில் மத்திய நிதி மந்திரி நிர்மலா சீதா ராமன் கலந்து கொண்டார். அப்போது அவர் பேசியதாவது:

வங்கி என்ற பெயரே மக்களை அச்சுறுத்த தொடங்கிவிட்டது. எங்கேயோ ஒருசிறிய கூட்டுறவு வங்கி செய்யும் மோசடியால் மக்களுக்கு வங்கிகள்மீது நம்பிக்கை குறைய தொடங்கியுள்ளது. ஏதோ ஓர்இடத்தில் யாரோ ஒருவர் செய்யும் தவறு மொத்தவங்கிகள் மீதும் சந்தேகம் ஏற்பட காரணமாக அமைந்து விடுகிறது.

ரிசர்வ் வங்கி மூலம் இங்குள்ள வங்கிகளை உலகத்தரத்திற்கு கொண்டுவரும் நடவடிக்கைகள் எடுக்கப்பட்டு வருகின்றன என தெரிவித்தார்.

மேலும் ப.கிருஷ்ணன் எழுதிய, முன்னாள் துணைவேந்தர் பாலகுருசாமியின் வாழ்க்கை வரலாற்று புத்தகத்தின் வெளியீட்டு விழா சென்னை அண்ணா பல்கலைக்கழகத்தில் நடைபெற்றது. இந்த விழாவில் கலந்துகொண்ட மத்திய அமைச்சர் நிர்மலா சீதாராமன்,புத்தகத்தை வெளியிட்டார். அதன் முதல் பிரதியை முன்னாள் நீதியரசர் சதாசிவம் பெற்றுக்கொண்டார்.

நிகழ்ச்சியில்பேசிய நிர்மலா சீதாராமன்; ஆசிரியர் தினத்தை கொண்டாடவில்லை என்றாலும்கூட, ஆசிரியர்கள் காட்டும் நல்வழிகளை பின் பற்றினால் வாழ்க்கை மேம்படும். அரசை குறைகூறாமல் விவசாயிகளை போல் தன்னம்பிக்கையுடனும், விடா முயற்சியுடனும் உழைக்கவேண்டும். என்ன பிரச்னை வந்தாலும் சோர்ந்து விடாமல் தொடர்ந்து முயற்சிப்பவர்கள் விவசாயிகள். விடா முயற்சி என்பதை விவசாயிகளிடம் இருந்துதான் கற்கவேண்டும்.

விவசாயிகள் எந்த விதத்திலும் தளர்ந்துபோக மாட்டார்கள். அதனால் தான் விவசாயிகள் தற்கொலை செய்துகொண்டால், அதைவிட கொடுமையான விஷயம் இல்லை என நம் அனைவரின் மனதில் ஒரு வித உறுத்தல் ஏற்படுகிறது. தன்னம்பிக்கையை விவசாயிகளிடம் தான் கற்கமுடியும் என்றார்.