மறைந்த முதல்வர் ஜெயலலிதாவின் 70-வது பிறந்ததினத்தை ஒட்டி, மானிய விலை ஸ்கூட்டர் வழங்கும்திட்டத்தை பிரதமர் நரேந்திரமோடி சனிக்கிழமை சென்னையில் தொடங்கிவைக்கிறார். இதற்கான விழா சென்னை கலைவாணர் அரங்கில் மாலை 6 மணிக்கு நடைபெறுகிறது.

பணிபுரியும் மகளிருக்கு 50 சதவீத மானியத்துடன் ஸ்கூட்டர் வழங்கப்படும் என தேர்தலில் மறைந்த முதல்வர் ஜெயலலிதா வாக்குறுதி அளித்திருந்தார். அந்தவாக்குறுதியை நிறைவேற்றும் வகையில், தமிழக அரசின் சார்பில் ஜெயலலிதா பிறந்த நாளான சனிக்கிழமை (பிப்.24) அந்தத்திட்டம் தொடங்கி வைக்கப்பட உள்ளது.

.மானிய விலை ஸ்கூட்டர் திட்டத் தொடக்க விழாவில் பங்கேற்பதற்காக பிரதமர் நரேந்திர மோடி சனிக்கிழமை மாலை 3.20 மணியளவில் தில்லியிலிருந்து தனிவிமானம் மூலம் புறப்படுகிறார். சென்னை விமான நிலையத்துக்கு மாலை 5.30 மணிக்குவருகிறார். சென்னை விமான நிலையத்தில் பிரதமரை ஆளுநர் பன்வாரிலால் புரோஹித், முதல்வர் பழனிசாமி, துணைமுதல்வர் ஓ.பன்னீர்செல்வம் உள்ளிட்டோர் வரவேற்கின்றனர். அங்கிருந்து ஹெலிகாப்டர் மூலம் காமராஜர் சாலையில் உள்ள ஐஎன்எஸ். ஹெலிகாப்டர் தளத்துக்கு வருகிறார். பின்னர், கார் மூலம் கலைவாணர் அரங்கத்துக்கு செல்கிறார். அங்கு நடைபெறும் விழாவில் மானிய விலை ஸ்கூட்டர் திட்டத்தைத் தொடங்கி வைக்கிறார்.