திருச்சி தூயவளனார் கல்லூரியின் 175-வது ஆண்டு விழா மற்றும் திருச்சி என்.ஐ.டி.யில் உற்பத்தி மையம் திறப்புவிழா இன்று நடைபெற்றது.

இதில் பங்கேற்க மத்திய மனிதவள மேம்பாட்டுத் துறை அமைச்சர் பிரகாஷ் ஜவடேகர் இன்று காலை திருச்சிவந்தார். திருச்சி விமான நிலையத்தில் அவர் நிருபர்களிடம் கூறியதாவது:-

திருச்சியில் நடைபெறும் முக்கியமான நிகழ்ச்சியில் பங்கேற்பதற்காக இங்குவந்துள்ளேன். திருச்சி தேசிய தொழில் நுட்ப வளாகத்தில் (என்.ஐ.டி.) இந்தியாவிலேயே முதன்முறையாக ரூ.190 கோடியில் உயர் ஆய்வுமையம் அமைக்கப்பட்டுள்ளது.

ஒரேவளாகத்தில் 13 ஆய்வக கூடங்கள் அமைக்கப் பட்டுள்ளது சிறப்பாகும். இது என்ஜினீயரிங் கல்வி மேம்பாட்டுக்காக மட்டுமல்லாது, தொழிற்சாலை திறன் மேம்பாட்டையும் ஊக்குவிக்கும்.
 

பொது மக்களுக்கு தேவையான குடிநீர், மின்சாரம், கழிப்பிடம் உள்ளிட்ட அடிப்படை வசதிகள், கியாஸ் இணைப்பு உள்ளிட்ட திட்டங்கள் முன்பு இருந்ததைவிட கடந்த 4 ஆண்டுகளில் 2 மடங்கு கூடுதலாக நிறைவேற்றப் பட்டுள்ளது.

தற்போது பெட்ரோல்- டீசல் விலை ரூ.5 வரை குறைக்கப்பட்டுள்ளது பொது மக்களுக்கு மிகப்பெரிய மகிழ்ச்சியை கொடுத்துள்ளது. ஏற்கனவே மத்திய அரசு ஒருலிட்டருக்கு ரூ.2.50 பைசா குறைத்துள்ளது. பாஜக ஆளும் 13 மாநிலங்களில் அந்தமாநில அரசுகளும் லிட்டருக்கு ரூ.2.50 பைசா குறைத்துள்ளது. இதன் மூலம் ரூ.5 குறைந்ததால் மக்கள் மகிழ்ச்சியடைந்துள்ளனர். மத்தியில் நரேந்திர மோடி தலைமையிலான பா.ஜனதா அரசு சிறப்புவாய்ந்த சாதனைகளை செய்துள்ளது இவ்வாறு அவர் கூறினார்