அனுமதிபெறாத 1,797 குடியிருப்பு பகுதிகளை முறைப்படுத்தி பட்டாவழங்கும் விழாவில் பேசிய பிரதமர் மோடி வேற்றுமையில் ஒற்றுமை என்பதே இந்தியாவின் சிறப்பம்சம் என குறிப்பிட்டார்.

நாட்டின் தலைநகரான டெல்லிக்குட்பட்ட பலபகுதிகளில் சுமார் 175 சதுர கிலோமீட்டர் பரப்பளவில் அனுமதி இல்லாத  குடியிருப்பு பகுதிகளில் ஏழை, எளியமக்கள் வீடுகட்டி வசித்து வருகின்றனர்.

எவ்வித அனுமதியும் இல்லாமல் இப்படி கட்டப் பட்டுள்ள வீடுகள் மற்றும் கடைகளை இடிக்கும் நடவடிக்கைகளை டெல்லி அரசு அவ்வப் போது எடுத்துவந்தது. இதற்கு எதிராக மக்கள் வழக்கு தொடர்வதும், அரசியல் கட்சியினர் கண்டனம் தெரிவிப்பதும் தொடர் கதையாக இருந்தது.

இப்படிப்பட்ட குடியிருப்பு பகுதிகளை எல்லாம் முறைப்படுத்தி அங்கீகாரம் அளிக்க மத்தியஅரசு மற்றும் டெல்லி அரசு முன்வர வேண்டும் என்ற கோரிக்கை பல ஆண்டுகளாக வலுத்தது.

இந்நிலையில், பிரதமர் நரேந்திர மோடி தலைமையில் நடைபெற்ற மத்திய மந்திரிசபை கூட்டத்தில் அனுமதி இல்லாத 1,797 குடியிருப்பு பகுதிகளுக்கு அங்கீகாரம் அளிக்க மத்திய மந்திரி சபை சமீபத்தில் ஒப்புதல் அளித்தது.

நவம்பர் மாதம் தொடங்கிய பாராளுமன்ற குளிர்கால கூட்டத்தொடரில் இதற்கான மசோதா தாக்கல் செய்து நிறைவேற்றப்பட்டது.

மேற்கண்ட 1,797 குடியிருப்பு பகுதிகளும் குறைந்த வருமானத்தினர் வாழும் பகுதியில் அமைந்துள்ளன. வசதிபடைத்தவர்கள் குடியிருக்கும் பகுதிகளில் உள்ள வீடுகள் இந்த வரையறைக்குள் வராது.

நீங்கள் யாரை நம்பி வாக்களித்தீர்களோ அவர்கள் உங்களுக்கு ஏதும் செய்ய வில்லை. மாறாக, தங்களுக்கு வேண்டியவர்களுக்கு சுமார் 2 ஆயிரம் ஆடம்பர பங்களாக்களை அளித்தனர். என்ன கைமாறு கருதி அவர்களுக்கு பங்களாக்கள் அளிக்கப்பட்டன என்பது யாருக்கும்தெரியாது.

நாடு சுதந்திரம் பெற்று பல ஆண்டுகள் ஆகியும் டெல்லியில் வாழும் பெரும்பாலான மக்கள் போலிதேர்தல் வாக்குறுதிகளுக்கு மயங்கி ஏமாந்து போனார்கள். அனுமதி பெறாத குடியிருப்பு மற்றும் வீடுகளுக்கு சீல்வைப்பு, இடிப்பு நடவடிக்கைகளில் சிக்கி பலர் வேதனைப் பட்டனர்.

இப்படி தவித்த 40 லட்சம் மக்களின் வசிப்பிடங்களை நிரந்தரப்படுத்தி புதிய விடியலை ஏற்படுத்தித்தரும் வாய்ப்பு எனக்கும் பாஜக அரசுக்கும் கிடைத்திருப்பதை எண்ணி நான் மகிழ்ச்சியடைகிறேன்.

இவ்வாறு அவர் பேசினார்.