தமிழகத்தில் தாமரை வேகமாக வளர்ந்துவருவதாக மத்திய இணையமைச்சர் பொன்.ராதாகிருஷ்ணன் தெரிவித்துள்ளார்.

மதுரை அருகே ஒத்தக்கடையில் பாஜக மகளிர் அணிசார்பில், தமிழ் மகள் தாமரை மாநாடு நடைபெற்று வருகின்றது. அதில் கலந்துகொண்டு பேசிய பொன். ராதாகிருஷ்ணன், “இந்தியாவில் 4 கோடி குடும்பங்களுக்கு இலவச எரி வாயு இதுவரை வழங்கப்பட்டுள்ளது. அனைவருக்கும் வீடுவழங்கும் திட்டத்தில் பெண்களுக்கு முக்கியத்துவம் அளிக்கப்படுகிறது.

7 கோடியே 50 லட்சம் கழிவறைகளை கட்டிக்கொடுத்து பெண்களின் கவலைகளை போக்கியவர் மோடி. காங்கிரஸ் ஆட்சியில் 6 கோடியாக இருந்த கழிவறை, பாஜகவின் 4 ஆண்டு ஆட்சிகாலத்தில் 7 கோடியாக மாறியுள்ளது. தமிழகத்தில் மோடி தலைமையிலான பாஜக ஆட்சி அமையவேண்டும் என்பதை இந்தகூட்டமே எடுத்து காட்டுகின்றது. தமிழகத்தில் மெல்லமெல்ல தாமரை மலர்ந்துவருகிறது.

பிரதமர் மோடி பெண்களுக்கு பலதிட்டங்களை வழங்கியுள்ளார். இந்த நாடு பெண்களை போற்றும் விதமாக பெண்களை கடவுளாக வழிபடுகின்றோம். பெண்குழந்தை பெற்றோம் என்றால் பலசிரமம் என கருதிய நிலையில், 114 மாவட்டங்களில் தற்போது பெண்குழந்தைகளின் பிறப்பு விகிதம் அதிகரித்துள்ளது.

பெண் குழந்தைகளின் கல்வி நிலையங்களில் கழிவறை அமைக்க முக்கியத்தும் அளித்தவர் மோடி. பெண்குழந்தைகளின் திறன் வளர்க்க மத்திய அரசு நடவடிக்கை எடுத்து வருகிறது. தமிழகத்தில் நடைபெறும் கழகங்களின் ஆட்சியில் தலைகீழாக நின்றாலும் மதுகடைகள் மூடப்படாது. பிரதமர் மோடியின் ஆட்சியில் மட்டுமே, தமிழகத்தில் அனைத்து மதுகடைகள் மூடப்படும்” என கூறினார்.