இந்தியாவிலே தயாரிப்போம் ( Make in India) திட்டத்தின் கீழ் தமிழ்நாட்டு ரயில்வே தொழிற்சாலை தமிழக பொறியாளர்களை கொண்டு தயாரிக்கப்பட்ட இந்தியாவின் முதல் இன்ஜின் இல்லாத ரயில் என்ற பெயர் பெற்ற வந்தே பாரத் அதிவிரைவு ரயில் சேவை சென்ற வாரம் டெல்லியிலிருந்து வாரணாசிக்கு நம் பாரதப்பிரதமரால் துவங்கி வைக்கப்பட்டது.

வந்தே பாரத் அதிவிரைவு ரயில் வாரணாசிக்கு குறிப்பிட்ட நேரத்தில் அடைந்து திரும்ப டெல்லிக்கு வரும் வழியில் டெல்லிக்கு 18 கி.மீ தொலைவில் துண்டுலா ரயில்வே நிலையத்தை தாண்டி சம்ருலா ரயில்நிலையத்திற்கு வரும்போது அடையாளம் தெரியாத பொருள் தாக்கியதால் கடைசி நான்கு பெட்டிகளுடைய தொலைத்தொடர்பு சாதனம் செயலிழந்தது . இதனால் ரயில் நிறுத்தப்பட்டு பழுது சரிசெய்யப்பட்டு மீண்டும் செயல்பட தொடங்கியது.மேலும் வந்தே பாரத் அதிவிரைவு ரயிலில் 15 நாளைக்கு அனைத்து பயணசீட்டுகளும் முன்பதிவு செய்யப்பட்டுவிட்டன என்பதே அந்த திட்டத்திற்கு மக்களிடம் கிடைத்த மாபெரும் வெற்றிக்கு சான்று .

தமிழகத்தில் உருவான ரயிலை தோல்வியான திட்டம் என விமர்சித்து தமிழகத்தின் உழைப்பை தமிழர்களின் தொழிநுட்ப அறிவை அவமானப்படுத்திய ராகுல் காந்தி இந்தியாவிலே தயாரித்த திட்டம் படுதோல்வி அடைந்துவிட்டதாகவும் இதை அறிமுகப்படுத்திய மோடி அரசின் இந்த திட்டம் தோல்வி அடைந்துவிட்டதாக ஒப்புக்கொண்டு இதை நிறுத்த வேண்டும் என்கிறார். ராகுல் காந்தி தமிழக ரயில்வே பொறியாளர்களை அவமானபடுத்தியதுடன் அவர்களுடன் சேர்ந்து உழைக்கும் பல்லாயிரம் ரயில்வே தொழிலாளர் களுக்கான புதிய வேலை வாய்ப்புகளை பறிக்கும் வகையிலான கருத்தை வெளியிட்டிருப்பது தவறு. தமிழகம்,தமிழர்கள்,தமிழின காவலர்கள் என சுய பட்டம் சூட்டிக்கொண்ட குடும்ப அரசியல் வாரிசு மு.க.ஸ்டாலின் தமிழர்களின் தொழிநுட்ப அறிவை அவமானப் படுத்திய ராகுல் காந்தியை கண்டிக்காதது ஏன்?

மோடியின் தேர்தல் அறிக்கையில் கூறிய புதிய வேலைவாய்ப்புகள் எங்கே? என கேட்கும் ராகுல் – இந்தியாவிலே தயாரிப்போம் என்ற மோடியின் மந்திரத்துடன் வரும் புதிய வேலை வாய்ப்புகளை வேண்டாம் என மறைமுகமாக எதிர்ப்பதன் மூலம் ராகுலின் இரட்டை வேடம் அம்பலமாகிறது.

ராகுல் காந்தியின் இத்தகைய விமர்சனம் தமிழ்நாட்டு ரயில்வே பொறியாளர்களை அவமதிக்கும் செயலாகும் இதை தமிழக பாஜக வன்மையாக கண்டிக்கிறது . ஏற்கனவே கலைஞர் கருணாநிதி காலத்தில் ராமர், சேது பாலத்தை விமர்சிக்கும் போது ராமர் என்ன எந்த பொறியியல் கல்லூரியில் படித்தார் என்று ஏளனம் பேசியதும் நினைவுக்கு வருகிறது. அதே பாணியில் இன்று ராகுல் காந்தி வந்தே பாரத் விரைவு ரயிலை வடிவமைத்த தமிழக பொறியாளர்களை அவமானப்படுத்தியிருக்கிறார். இதை தமிழக பாஜக வன்மையாக கண்டிக்கிறது. ராகுல் காந்தி இக்கருத்தை திரும்ப பெறவேண்டும் என வலியுறுத்தி தமிழக பாஜக தலைவர் டாக்டர்.தமிழிசை சௌந்தராஜன் தனது கண்டனத்தை தெரிவித்துள்ளார்.