‘ஆப்கானிஸ்தானில் பிணைக் கைதியாக சிக்கி இருந்த பேராயர் அலெக்ஸிஸ் பிரேம்குமாரை மீட்டு வந்ததுதான் எனக்கு மிகவும் திருப்தியான தருணம்,’ என்று டில்லியில் நடந்த கிறிஸ்துமஸ் விழாவில் பிரதமர் மோடி பேசினார்.

இந்திய கத்தோலிக்க பேராயர்கள் பேரவை சார்பில் இன்று ஏற்பாடு செய்யப்பட்ட கிறிஸ்துமஸ் விழாவில் பிரதமர் மோடி பங்கேற்று சிறப்புரையாற்றினார்.டில்லியில் நடந்த இந்நிகழ்ச்சியில் கிறிஸ்தவ சமுதாயத்தின் முக்கிய தலைவர்கள் பங்கேற்றனர்.

பிரதமர் மோடி பேசியதாவது:
இந்நிகழ்ச்சியில் தான் பங்கேற்றது மிக்க மகிழ்ச்சி அளித்தது. உங்களுடன் நான் பங்கேற்பது, நம் அனைவருக்குமே மறக்க முடியாததொரு தருணமாக அமைந்துள்ளது. உலகில் வன்முறையைப் பரப்பும் முயற்சிகள் நடக்கும்போது மனது வலிக்கிறது.

ஆண்டவர் கிறிஸ்துவின் போதனைகள் அன்பு, நல்லிணக்கம் மற்றும் சகோதரத்துவத்தை போற்றுகின்றன. இந்த உணர்வை வலுப்படுத்த அனைவரும் பணியாற்றுவது முக்கியம். பத்தாண்டுகளுக்கு முன்னர் போரினால் பாதிக்கப்பட்ட ஆப்கானிஸ்தானில் இருந்து பேராயர் அலெக்சிஸ் பிரேம் குமாரை பத்திரமாக அழைத்து வந்தது எனக்கு மிகவும் திருப்திகரமான தருணம். அவர் எட்டு மாதங்கள் அங்கேயே சிக்கி, பிணைக் கைதியாக இருந்தார்.

எங்களைப் பொறுத்தவரை, இந்த பணிகள் அனைத்தும் வெறும் தூதரகப் பணிகள் மட்டும் அல்ல. குடும்ப உறுப்பினர்களை மீண்டும் அழைத்து வருவதற்கான உணர்ச்சிபூர்வமான அர்ப்பணிப்பு.அவர்கள் எங்கிருந்தாலும், எந்த நெருக்கடியை எதிர்கொண்டாலும், இன்றைய இந்தியா தனது குடிமக்களைப் பாதுகாப்பாக அழைத்துச் செல்வதை தனது கடமையாகப் பார்க்கிறது.

இவ்வாறு மோடி பேசினார்.