தமிழ்நாட்டில் கடந்த இரண்டு வருடங்களில் நான்கு ஆயிரத்துக்கும் மேற்பட்டகொலைகள் நிகழ்ந்துள்ளன என பாட்டாளி மக்கள்கட்சி நிறுவனர் ராமதாஸ் சாடியுள்ளார்.

பாஜக.,வின் மாநில பொதுச்செயலர் ஆடிட்டர் ரமேஷ் கொலைக்கு கண்டனம்தெரிவித்து ராமதாஸ் வெளியிட்ட அறிக்கையில், ரமேஷ் சேலத்தில் உள்ள அவரது இல்லத்தில் நேற்றிரவு கொடூரமானமுறையில் படுகொலை செய்யப்பட்டதை அறிந்து பெரும் அதிர்ச்சியும், துயரமும், வேதனையும் அடைந்தேன். அவரை இழந்துவாடும் குடும்பத்தினருக்கும், நண்பர்களுக்கும் எனது ஆழ்ந்த இரங்கலையும், அனுதாபத்தையும் தெரிவித்துக்கொள்கிறேன்.

தணிக்கையாளர் ரமேஷின் வீட்டு வளாகத்தில் பதுங்கியிருந்த கொலைகாரர்கள்தான் அவரை கொலைசெய்து விட்டு தப்பி ஓடிவிட்டதாக கூறப்படுகிறது. ரமேஷின் உயிருக்கு அச்சுறுத்தல் இருப்பதால் பாதுகாப்பு அளிக்கவேண்டும் என்று அவரது ஆதரவாளர்கள் ஏற்கனவே முறையீடு அளித்திருந்தபோதும், அவருக்கு பாதுகாப்பு வழங்க காவல் துறை தவறிவிட்டது. ஒரு தேசியகட்சியின் மாநில பொதுச் செயலாளர் படுகொலையை காவல்துறை தடுக்காதது கண்டிக்கத்தக்கதாகும்.

கடந்த 9 மாதங்களில்மட்டும் இவர் சார்ந்த அமைப்புகளைச் சேர்ந்த 4 பேர் படுகொலை செய்யப்பட்டுள்ளனர். ஆனால், இந்தகொலைகளுக்கு காரணமானவர்கள் எவரும் இதுவரை கைது செய்ய படவில்லை என்பது தமிழக காவல் துறையின் திறமையின்மையை காட்டுகிறது.
தமிழ்நாட்டில் கடந்த 2011ஆம் ஆண்டு அதிமுக. அரசு பதவி ஏற்றதிலிருந்தே சட்டம் ஒழுங்கு சந்தி சிரித்து கொண்டிருக்கிறது. கடந்த 2 ஆண்டுகளில் தமிழகம்முழுவதும் 4 ஆயிரத்திற்கும் மேற்பட்டகொலைகள் நடந்திருக்கின்றன; 40 ஆயிரத்திற்கும் மேற்பட்ட கொள்ளை மற்றும் திருட்டுவழக்குகளும் பதிவாகியிருக்கின்றன.

இவற்றையெல்லாம் தடுக்கவேண்டிய காவல் துறைக்கு பொறுப்புவகிக்கும் முதலமைச்சரோ, பாட்டாளி மக்கள்கட்சியினர் மீது பொய்வழக்குகளை பதிவுசெய்வது, அப்பாவித் தொண்டர்களை குண்டர்சட்டம் மற்றும் தேசியப்பாதுகாப்பு சட்டங்களில் கைதுசெய்து சிறையில் அடைப்பது, பாமக. மீது அவதூறுபரப்புவது ஆகியவற்றில் மட்டுமே அக்கறைகாட்டி வருகிறார்.

பாமக.வினரை பழிவாங்குவதில் காட்டும் தீவிரத்தில் பத்தில் ஒருபங்கை சட்டம் – ஒழுங்கை பாதுகாப்பதில் காட்டியிருந்தால் இதுபோன்ற படுகொலைகளை தடுத்து, தமிழகத்தை அமைதிப்பூங்காவாக பராமரித்திருக்க முடியும். ஒரே அமைப்பைச்சேர்ந்தவர்கள் தொடர்ந்து படுகொலை செய்யப்படுவது சாதாரணமானதாக தோன்ற வில்லை. இதன்பின்னணி குறித்து விரிவான விசாரணை நடத்த ஆணையிடவேண்டும். இந்த கொலைகளுக்கு காரணமானவர்கள் யார் என்பதை கண்டுபிடித்து, அவர்கள்மீது கடும் நடவடிக்கை எடுப்பதுடன், உயிருக்கு அச்சுறுத்தல் உள்ள தலைவர்கள் அனைவருக்கும் போதிய பாதுகாப்பையும் தமிழக அரசு வழங்கவேண்டும் என்று கூறியுள்ளார்.