ஜம்முகாஷ்மீர் மாநிலத்தில் எல்லையோர கிராமமான ஷாலாபடாவை பாகிஸ்தான் ஆக்கிரமித்துள்ளதாக திடுக்கிடும்தகவல்கள் வெளியாகியுள்ளன.

இதனால் எல்லையில் பதற்றமானசூழல் நிலவிவருகிறது. ஜம்முகாஷ்மீர் மாநிலம் எல்லை கட்டுப்பாட்டுக் கோட்டுப்பகுதியில் பாகிஸ்தான் ராணுவம் அத்துமீறி தாக்குதல்நடத்துவது தொடர்கதையாகி வருகிறது. அத்துடன் தீவிரவாதிகளை ஊடுருவச் செய்து திடீர் தாக்குதல்களையும் பாகிஸ்தான் ராணுவம் மேற்கொண்டு வருகிறது.

இந்நிலையில் கடும் எதிர்ப்புகளுக்கு மத்தியில் பிரதமர் மன்மோகன் சிங், பாகிஸ்தான் பிரதமர் நவாஸ்ஷெரீப்புடன் நியூயார்க்கில் அண்மையில் பேச்சுவார்த்தை நடத்தியிருந்தார். இந்நிலையில் ஜம்மு காஷ்மீர் மாநிலத்தின் குப்வாரா மாவட்டத்தில் உள்ள ஷாலாபடா என்ற எல்லையோர கிராமத்தை பாகிஸ்தான் ராணுவத்தினர் ஆக்கிரமித்திருப்பதாக செய்திகள் வெளியாகியுள்ளன.

இந்த கிராமம் கைவிடப்பட்டகிராமம். இங்கு மக்கள் கைவிட்டுச்சென்ற வீடுகளில் தற்போது பாகிஸ்தான் ராணுவத்தினர் தங்கியிருப்பதாகவும் கூறப்படுகிறது. இதைத்தொடர்ந்து பாகிஸ்தான் ராணுவத்தினரை வெளியேற்ற இந்திய படையினர் தாக்குதல்நடத்தி வருவதாகவும் எல்லையில் பதற்றமான சூழல் நிலவி வருவதாகவும் தகவல்கள் தெரிவிக்கின்றன.