பிகாரில் இருந்து இங்குவரும் மக்களையும், ஒடிஸாவிலிருந்து இங்கு வருவோரையும் மார்வாரிகளையும் விரட்டி அடிக்கிறீர்கள். ஆனால் வங்கதேசத்தை சேர்ந்தவர்களை தாராளமாக அனுமதிக்கிறீர்கள், மத்தியில் பாரதிய ஜனதா ஆட்சிக்குவந்தால், நாட்டில் சட்ட விரோதமாக குடியேறியுள்ள வங்கதேசத்தினர் வெளியேற்றப்படுவார்கள் என்று பா.ஜ.க பிரதமர் பதவிவேட்பாளர் மோடி எச்சரிக்கை விடுத்துள்ளார்.

மேற்குவங்க மாநிலம் செராம்பூரில் ஞாயிற்றுக்கிழமை நடைபெற்ற தேர்தல் பிரசாரக்கூட்டத்தில் மேலும் அவர் பேசியதாவது: இங்கு திரளாககூடி இருக்கும் சகோதர, சகோதரிகளே, நீங்கள் ஒன்றை இப்போதே எழுதிவைத்துக் கொள்ளுங்கள்.

மக்களவை தேர்தலுக்கான வாக்கு எண்ணிக்கை நடைபெற உள்ள மே 16ஆம் தேதிக்குப்பிறகு, நமது நாட்டில் சட்டவிரோதமாக குடியேறியுள்ள வங்கதேசத்தினர் அனைவரும் மூட்டை, முடிச்சுகளை தூக்கிக்கொண்டு தங்களது நாட்டைநோக்கி வெளியேற வேண்டியிருக்கும்.

வாக்குவங்கியாக கருதி மம்தா பானர்ஜி வங்க தேசத்தினரை வெளியேற்றாமல் விட்டுவிட்டார். வங்க தேசத்தினரை மம்தா பானர்ஜி சிவப்புகம்பளம் விரித்து வரவேற்கிறார்.

பிகாரில் இருந்து இங்குவரும் மக்களையும், ஒடிஸாவிலிருந்து இங்கு வருவோரையும் மார்வாரிகளையும் விரட்டி அடிக்கிறீர்கள். ஆனால் வங்கதேசத்தை சேர்ந்தவர்களை தாராளமாக அனுமதிக்கிறீர்கள். அவர்களை மனமுவந்து வரவேற்கிறீர்கள்.

வாக்குவங்கி அரசியல் மூலம் மம்தா பானர்ஜி இந்நாட்டு மக்களை தொடர்ந்து அவமதித்துவருகிறார். இடதுசாரிகள் 35 ஆண்டுகள் இந்த மாநிலத்தை சீரழித்ததைவிட மம்தாபானர்ஜி 35 மாதங்களில் கூடுதலாக சீரழித்துள்ளார்.

இனி, வாக்குவங்கி அரசியல் ஒருபோதும் எடுபடாது. நான் செல்லும் இடங்களில் எல்லாம் நாட்டின்வளர்ச்சி, நல்லாட்சி குறித்துதான் பேசி வருகிறேன்.

நான் இளைஞர்களுக்கான வேலை வாய்ப்பு குறித்து பேசும் போதும், விவசாயிகளுக்கான நலத்திட்டங்கள் குறித்து பேசும் போதும், பெண்களுக்கான பாதுகாப்புகுறித்து பேசும்போதும் எதிர்க்கட்சியினர் பேசும் ஒரே வார்த்தை மதச்சார்பின்மைதான். அவர்கள் இதுதவிர வேறு எதுவும் பேசமுடியாது.

தற்போது மம்தா பானர்ஜி, சோனியாகாந்தி, இடதுசாரி கட்சிகள், மாயாவதி போன்றோர் வாக்குவங்கி அரசியலில் தான் ஈடுபட்டு வருகிறார்கள் என்று மோடி பேசினார்.