வெள்ள பாதிப்புக் குள்ளான காஷ்மீரில், தொலைத் தொடர்பு சேவையை மீண்டும் துவக்க, மத்திய அரசு மும்முரம் காட்டிவருவதாக மத்திய அமைச்சர் ரவிசங்கர் பிரசாத் தெரிவித்துள்ளார்.

மத்திய தொலைத் தொடர்பு அமைச்சகத்தின் 100 நாட்கள் சாதனைகுறித்து, டில்லியில் நிருபர்களிடம் துறை அமைச்சர் ரவி சங்கர்பிரசாத் பேசினார். அப்போது அவர் கூறுகையில், வெள்ள பாதிப்புக்குள்ளான காஷ்மீரில் தொலைத்தொடர்பு சேவையை மீண்டும் முழு அளவில் துவக்க மத்திய அரசு மும்முரம்காட்டி வருகிறது. மொத்தமுள்ள 12,306 மொபைல் போன் டவர்களில் 6811 டவர்கள் தண்ணீரில் மூழ்கின. இதில் 1208 டவர்கள் சரி செய்யப்பட்டு மீண்டும் செயல்படத் துவங்கியுள்ளன. வெள்ள பாதிப்புக்குள்ளான காஷ்மீரில் இலவச மொபைல்போன் சேவையை பிஎஸ்என்எல்., அறிமுகப்படுத்தியுள்ளது. ஒருவார காலத்திற்கு இந்தசேவை அமலில் இருக்கும். இதேபோல், மற்ற தொலைத்தொடர்பு நிறுவனங்கள், ஒரு நாளைக்கு ஒருமணி நேரம் இலவசமாக பேசிக்கொள்ள அனுமதி வழங்கியுள்ளன.

அமைச்சகத்தின் சார்பில் இ கிரீட்டிங் முறை விரைவில் அமல்படுத்தப்படும். டிஜிட்டல் இந்தியா திட்டத்தின் கீழ் மூன்று ஐ.டி.,க்களில் (இந்தியன் டேலண்ட், இன்பர்மேஷன் டெக்னாலஜி மற்றும் இந்தியா டுமாரோ) கவனம் செலுத்தப்படும். நாடுமுழுவதும் தொலைக் காட்சி சேவை விரிவுபடுத்தப்பட்டதை போன்று, பிராட் பேண்டு சேவையும் விரிவுபடுத்தப்படும். ஸ்பெக்ட்ரம் ஒதுக்கீடு விஷயத்தில் டிராய் பரிந்துரைகள் கவனத்தில் கொள்ளப்படும். சைபர் குற்றங்களை தடுக்க தேசியசைபர் ஒருங்கிணைப்பு மையம் உருவாக்கப்படும். நீதித் துறையின் சுதந்திரம் என்பது தேசிய ஜனநாயக கூட்டணியை பொருத்தவரையில் புனிதமானது. இவ்வாறு ரவிசங்கர் பிரசாத் தெரிவித்தார்.