காங்கிரஸ் தலைவர் சோனியா காந்தியின் மருமகன் ராபர்ட்வதேரா, அரியானாவில் பூபிந்தர்சிங் ஹூடாவின் தலைமையிலான காங்கிரஸ் அரசு இருந்தபோது சிகோபூர், குர்கான் ஆகிய நகரங்களில் அரசிடம் இருந்து குறைந்தவிலைக்கு நிலங்களை வாங்கி, அதேநிலங்களை தனியார்

ரியல்எஸ்டேட் நிறுவனம் ஒன்றுக்கு 58 கோடி ரூபாய்க்கு விற்பனை செய்ததாக கூறப்பட்டது. இதன் மூலம் வதேரா ரூ.44 கோடி அளவிற்கு ஆதாயம் அடைந்ததாகவும் குற்றச்சாட்டு எழுந்தது.

அண்மையில் அரியானாவில் நடந்துமுடிந்த சட்டசபை தேர்தலில் பா.ஜ.க ஆட்சியைக் கைப்பற்றியது. இதைத் தொடர்ந்து இந்த முறைகேடு தொடர்பாக விசாரணை நடத்தமுடிவு செய்யப்பட்டு இருப்பதாக மாநில பா.ஜனதா அரசு அறிவித்தது.

இந்த நிலையில் சனிக்கிழமை இரவு டெல்லி அசோகா ஓட்டலில் நடந்த ஒருநிகழ்ச்சியில் ராபர்ட் வதேரா கலந்துகொண்டார். அப்போது, தனியார் தொலைக்காட்சி நிருபர் ஒருவர் மைக்கை வதேரா முன்பாக நீட்டி நில விவகாரம் குறித்து அவரிடம் கேள்விகளை எழுப்பினார்.

இதனால் ஆவேசம் அடைந்த வதேரா, இது தீவிர மான பிரச்சினையா? என்று 3 முறை தொடர்ந்து கேட்டார். மேலும் நீங்கள் என்ன பைத்தியமா? உங்களுக்கு என்ன ஆயிற்று? என்றும் கோபத் துடன் கேள்வி எழுப்பினார். அப்போது தொலைக் காட்சி நிருபர் வைத்திருந்த மைக்கை வதேரா கோபத்துடன் தட்டிவிட்டார்.

ராபர்ட் வதேராவின் இந்தசெயல் குறித்து இந்திய கம்யூனிஸ்டு கட்சியின் தலைவர்களில் ஒருவரான டி.ராஜா கூறுகையில், பிரபலமான மனிதர் ஒருவர் இது போன்று நடந்து கொண்டிருப்பது துரதிர்ஷ்ட வசமான ஒன்று என்றார்.

பா.ஜ.க தலைவர்களில் ஒருவரான சுப்பிரமணியசாமி, வதேராவின் இந்தசெயலுக்காக அவருக்கு அளிக்கப்பட்டு வரும் சிறப்புபாதுகாப்பை மத்திய அரசு திரும்பப் பெறவேண்டும் என்று கூறினார்.

தேசியவாத காங்கிரஸ் தலைவர்களில் ஒருவரான மஜித்மேன் கருத்து தெரிவிக்கையில், ஜனநாயக நாட்டில் கடினமான கேள்விகளை எதிர்நோக்கும் போது அரசியல்வாதிகள் இதுபோல் நடந்து கொள்ளக் கூடாது என்று குறிப்பிட்டார்.

பா.ஜ.க தலைவர் சேஷாத்ரிசாரி நிருபர்களிடம் கூறுகையில், ''ஒருவேளை இந்தபிரச்சினையை மாநில அரசு தீவிரமாக கருதாது என்று வதேரா நினைத்தாரோ, என்னவோ?. ஆனால், மத்திய அரசும், அரியானா மாநில அரசும் இந்த நிலமுறைகேடு விவகாரம் குறித்து தீவிர விசாரணை நடத்தும்'' என்று குறிப்பிட்டார்.

அரியானா முதல்மந்திரி மனோகர் லால் கட்டார் இந்தசம்பவம் குறித்து கூறுகையில், இந்த விஷயத்தில் சட்டம் தனது கடமையை செய்யும் என்றார்.