ஜம்மு-காஷ்மீர் மாநிலத்தில் பிப்ரவரி 7ல் நடைபெற விருக்கும் மாநிலங்களவை தேர்தலில் பாஜ சார்பாக ஷம்சர் சிங் மன்ஹாஸ் மற்றும் சந்தர்மோகன் சர்மா ஆகிய 2 பேர் போட்டியிடுகின்றனர். அவர்கள் இன்று வேட்புமனு தாக்கல் செய்கின்றனர் என்று பாஜவின் அகில இந்திய தலைவர் அமித்ஷா நேற்றிரவு புதுடெல்லியில் கூறினார்.

ஜம்மு-காஷ்மீர் மாநிலத்தில் நடைபெற்ற சட்டமன்ற தேர்தலில் பாஜவுக்கு 25 இடங்களும், முப்தி முகமது சயீத்தின் மக்கள் ஜனநாயக கட்சிக்கு 28 இடங்களும் கிடைத்தன. எந்த கட்சிக்கும் பெரும்பான்மை கிடைக்காததால், அங்கு ஆட்சி அமைப்பதில் சிக்கல் நிலவி வருகிறது.

இந்நிலையில், ஜம்மு -காஷ்மீர் மாநிலத்தில் இருந்து ராஜ்யசபாவுக்கு ஏற்கெனவே தேர்ந்தெடுக்கப்பட்ட காங்கிரசை சேர்ந்த குலாம் நபி ஆசாத் மற்றும் சயீப் உத் தீன் சோஸ் ஆகிய இருவரின் பதவிக் காலம் பிப்ரவரி 10-ம் தேதியும், தேசிய மாநாட்டு கட்சியை சேர்ந்த குலாம் நபி வானி மற்றும் முகமது சபி ஆகியோரின் பதவிக் காலம் 15-ம் தேதியும் முடிவு பெறுகிறது.எனவே, இந்த 4 ராஜ்யசபை உறுப்பினர்களுக்கான தேர்தல் வரும் 7-ம் தேதி நடைபெறுகிறது. இத்தேர்தலில் போட்டியிடுவதற்கு வேட்பு மனு தாக்கல் செய்வதற்கு இன்று கடைசி நாளாகும்.

இந்நிலையில், ஜம்மு -காஷ்மீர் மாநிலத்தில் இருந்து ராஜ்யசபாவுக்கு போட்டியிடும் 2 வேட்பாளர்களை நேற்றிரவு பாஜ தலைமை அறிவித்தது.பாஜவின் தேசிய செயற்குழுவின் உறுப்பினரும் அம்மாநில முன்னாள் தலைவருமான ஷம்சர்சிங் மன்ஹாஸ் மற்றும் அம்மாநில முன்னாள் யுவ மோர்ச்சா தலைவவரும் மூத்த பாஜ உறுப்பினருமான சந்தர் மோகன் சர்மா ஆகிய 2 பேரும் பாஜ சார்பாக போட்டியிடுகின்றனர். அவர்கள் இன்று வேட்புமனு தாக்கல் செய்வார்கள் என்று பாஜவின் அகில இந்திய தலைவர் அமித்ஷா நேற்றிரவு புதுடெல்லியில் கூறினார்.